Foto: canva
1 qazanǵa deıin múlik salyǵyn tólemeseńiz, ósimpul qosylady
Komıtettiń málimetinshe, múlik salyǵy "Azamattarǵa arnalǵan úkimet" memlekettik korporasııasy aıqyndaıtyn salyq salý obektileriniń quny men menshik quqyǵy ıelengen merzimge baılanysty esepteledi.
Salyq somasy kórsetilgen habarlamalar shilde aıynda menshik ıelerine joldanǵan, al bankterdiń mobıldi qosymshalaryn paıdalanýshylarǵa PUSH-habarlamalar arqyly jetkizilgen.
Memlekettik kirister komıteti 2025 jyldyń 2 qazanynan bastap múlik salyǵyn ýaqytyly tólemegen azamattarǵa ósimpul esepteletinin jáne bereshek týraly habarlamalar joldanatynyn málimdedi. Al 14 qarashadan bastap, bereshek somasy 1 AEK-ten asqan jaǵdaıda azamattarǵa salyqtyq buıryqtar joldanyp, 5 jumys kúni ishinde tólenbese, is jeke sot oryndaýshylaryna jiberiledi.
"Atqarýshylyq is júrgizý jáne sot oryndaýshylarynyń mártebesi týraly" zańǵa sáıkes, sot oryndaýshylary boryshkerlerdiń bank shottaryna jáne múlkine tyıym salýǵa, múlikti satýǵa, tipti Qazaqstannan shyǵýǵa shekteý qoıýǵa quqyly. Eger bereshek 40 AEK-ten asyp ketse, azamattyń shetelge shyǵýyna tyıym salynýy múmkin.
Sonymen qatar, 2024 jylǵy 19 tamyzdan bastap salyqtyq mindettemelerdi májbúrlep oryndatýdyń jeńildetilgen tártibi kúshine engen. Eger bereshek 20 AEK-ten kem bolsa, ol avtomatty túrde óndiriledi: bank shottaryna buǵat qoıylady, múlikke qatysty operasııalar shekteledi. Bul rette jeke sot oryndaýshysynyń qyzmetin tóleý talap etilmeıdi.
Azamattar ózderiniń salyq bereshegi týraly málimetti e-Salyq Azamat qosymshasy nemese ekinshi deńgeıli bankterdiń mobıldi qosymshalary arqyly teksere alady.
Memlekettik kirister komıteti qazaqstandyqtardy jeke sot oryndaýshylarǵa is túspeı turyp, múlik salyǵyn ýaqytynda tóleýge shaqyrdy.
