Qaıǵyly oqıǵa 17 qyrkúıek kúni saǵat 00:54 shamasynda Aqadyr – Qaraǵandy ýchaskesindegi Jaryq-Darııa temirjol ótkelinde bolǵan. Mazda kóligi ótkelden ótpek bolǵan kezde poıyzdyń astyna túsken.
Poıyz saǵatyna 92 km jyldamdyqpen kele jatqan. Mashınıst jeńil kólikti baıqap, shuǵyl tejegishti basqanymen, soqtyǵysýdyń aldyn alý múmkin bolmapty.
- Qaıǵyly oqıǵa 17 qyrkúıek saǵat 00:54-te Aqadyr – Qaraǵandy ýchaskesi Jaryq-Darııa aralyǵyndaǵy temirjol ótkelinde oryn aldy.Apat saldarynan avtokólik júrgizýshisi men eki jolaýshy aýyr jaraqattan qaza tapty-dep habarlady «Qazaqstan Temir Joly» kompanııasy.
Qazir atalǵan fakti boıynsha qylmystyq is qozǵalyp, oqıǵanyń mán-jaıy anyqtalyp jatyr.
Jyl basynan beri elimizde poıyzdardyń 972 ret shuǵyl tejeýine týra kelgen.Onyń ishinde 211 jaǵdaı adamdarmen, al 725 oqıǵa úı janýarlarymen baılanysty. Belgilenbegen jerden ótkeni úshin 29 350 azamat ákimshilik jaýapkershilikke tartyldy.
Temirjol quramymen baılanysty jol-kólik apattarynan 41 adam zardap shekken, olardyń jartysyna jýyǵy qaza tapqan. Qurbandar arasynda kámeletke tolmaǵan balalar da bar.
Mamandardyń aıtýynsha, apattardyń negizgi sebebi — qaýipsizdik erejelerin elemeý. Kóp jaǵdaıda adamdar ruqsat etilmegen jerden ótip, tipti mas kúıinde temirjolǵa shyǵyp, óz ómirin qaterge tigedi.
Jalpy el aýmaǵynda jol-kólik apattarynyń da kúrt ósýi baıqalady. Bıyl olardyń sany 42%-ke artqan. Jyl basynan beri 22,5 myńnan astam apat tirkelip, 32 myńnan asa adam jaraqat aldy. Júgensiz júrgizýshilerdiń áreketinen 1446 adam qaza tapqan, onyń ishinde 209 bala bar.
