Merekelik is-sharaǵa FIFA-nyń jahandyq damý jónindegi dırektory Stıven Martens, QFF bas hatshysy Davıd Lorııa, FIFA-nyń High Performance baǵdarlamasynyń jetekshisi Ýlf Shott, álem chempıony ári FIFA ańyzy Krıstıan Karambe, sondaı-aq otandyq fýtbol ardagerleri men akademııa tárbıelenýshileri qatysty.
«1994 jyly Qazaqstan fýtbol federasııasy FIFA-nyń tolyqqandy múshesi atandy. Búgin biz balalar men jasóspirimderge sportta jol ashatyn akademııany iske qosyp otyrmyz. Bul jumys qazaq fýtbolynyń bolashaǵyn aıqyndaıdy. Akademııa túlekteri jýyq arada el klýbtary men ulttyq qurama sapynda oınap, Qazaqstannyń atyn álemge tanytady dep senemin», dedi fýtbol ardageri Quralbek Ordabaev quttyqtaý sózinde.
FIFA prezıdenti Djannı Infantıno beıneúndeý joldap, jańa bastamany jastar armanyna jasalǵan mańyzdy ınvestısııa ekenin atap ótti. Onyń aıtýynsha, akademııa jas oıynshylardyń áleýetin ashyp qana qoımaı, olardy tártipke, komandada oınaýǵa jáne jaýapkershilikke tárbıeleıdi.
FIFA dırektory Stıven Martens te sóz sóılep, QFF akademııasy Ortalyq Azııadaǵy alǵashqy Talent Academy bolǵanyn erekshe atap ótti.
«Bul – otandyq fýtbol úshin úlken jetistik. Joba ýaqyt óte kele óz jemisin beredi», dedi ol.
Al QFF bas hatshysy Davıd Lorııa akademııaǵa mártebe berilýin elimizdegi balalar men jasóspirimder fýtbolyn júıeli damytý jolyndaǵy mańyzdy qadam dep baǵalady:
«Bul – halyqaralyq qaýymdastyqtyń senimi ári úlken jaýapkershilik. Fýtboldyń bolashaǵy jastarmen jumysqa baılanysty. Biz osy baǵytta eńbektene beremiz», dedi ol.
Saltanatty rásimnen keıin FIFA ókilderi QFF basshylyǵyna resmı mártebeniń belgisin tabystady. Shara barysynda ashyq jattyǵý men joldastyq match uıymdastyrylyp, keıin jas fýtbolshylarǵa Krıstıan Karambe sheberlik sabaǵyn ótkizip, aqyl-keńesin aıtty. Sońynda barlyq qatysýshylarǵa estelik medaldar men syılyqtar tabystaldy.
