Parasatty poezııa paıǵambarynyń toıyna Almatydan aqynnyń jary Saltanat, uly Ǵazız, nemereleri arnaıy keldi. Sondaı-aq Jazýshylar Odaǵy basqarmasy tóraǵasy Mereke Qulkenov, Memlekettik syılyqtyń ıegeri, aqyn Aqushtap Baqtygereeva, pýblısıst, jýrnalıst Qaınar Oljaı da toıdyń tórinen tabyldy. 90 jyldyq toıdyń shymyldyǵy aqynnyń eskertkishine gúl shoqtaryn qoıýmen bastaldy. Meımandarǵa Batys Qazaqstan oblysynyń ákimi Narıman Tóreǵalıev bastaǵan jergilikti basshylar, belgili qoǵam qaıratkerleri, zııaly qaýym ókilderi qurmet kórsetti.
Eń úlken is-shara Ǵarıfolla Qurmanǵalıev atyndaǵy oblystyq fılarmonııanyń «Atameken» óner ordasynda jalǵasty. Fılarmonııa ujymy usynǵan konserttik baǵdarlama tek qana Qadyr shyǵarmalarynan turdy. Qatımolla Berdiǵalıev bastaǵan dúldúl ánshilerge Dáýletkereı atyndaǵy ult-aspaptar orkestri dem berip otyrdy.
Qadyr aqynnyń toıy – halyqtyń toıy. Qazaqtyń eńbektegen balasy jattaıtyn taqpaqtan bastap, eńkeıgen qarııasy aıtatyn bata-naqyl sózge deıin Qadyr aǵamyzdyń qalamynan tys qalǵan joq. Bıyl qazaqtyń úsh aqynynyń 90 jyldyǵy. Olar – Tumanbaı Moldaǵalıev, Qadyr Myrza Áli jáne Jumeken Nájimedenov. Osy úsheýi – qazaq poezııasynyń, qazaq ádebıetiniń altyn shegeleri, - deıdi Qazaqstan Jazýshylar Odaǵynyń basqarma tóraǵasy Mereke Ábdeshuly.
«Qazaq rýhanııatynyń qambasyna qısapsyz qazyna qosqan Qadyr aǵamyzdyń juldyzy máńgilik jarqyraı bermek» dep sóz sóılegen Batys Qazaqstan oblysynyń ákimi Narıman Tóreǵalıev aqynnyń jary Saltanat Qadyrqyzyna syı-qurmet kórsetti. Osy sátte aqyn shyǵarmashylyǵy jaıynda «Qadyrdyń qanatty sózderi» jáne «Júregime jetken jyr» atty kitaptardyń tusaýy kesildi.
- Men HIH ǵasyrdyń uly tulǵasy Abaıdyń elinde týyp-óstim. Al HH ǵasyrda qazaq qandaı boldy, qandaı bolýy kerek edi, qazaqqa ne kerek edi degen saýalǵa júginsek, – osynyń bári Qadyrda bar. Qadyrdyń shyǵarmashylyǵy – qazaqtyń qazyǵy. Qadyrdy tereń oqý kerek, bilip oqý kerek, sonda Qadyrdan tabylmaıtyn qazyna joq. Ol – asqan kóregen adam. Sonaý 1970 jyldary, sol sovet zamanynda-aq bizdiń bolashaq gımnimizdiń, gerbimizdiń qandaı bolatynyn boljap aıtyp ketken. Qadyrdyń poezııasy, Qadyrdyń shyǵarmashylyǵy osy kezge deıin qazaqqa qyzmet etip keledi, qyzmet ete de bermek! – dedi Qaınar Oljaı.
Mereıtoılyq baǵdarlama sheńberinde aqyn shyǵarmashylyǵyna arnalǵan respýblıkalyq ǵylymı-praktıkalyq konferensııa ótti. Bir top óner jáne mádenıet qaıratkerleri Qadyr Myrza Áliniń 90 jyldyǵyna oraı arnaıy shyǵarylǵan mereıtoılyq tósbelgige ıe boldy. Erteń aqynnyń týǵan jerinde, Jympıty topyraǵynda Qadyr Myrza Áli atyndaǵy rýhanııat zaly, aqyn rýhyna arnalǵan mural ashylmaq. Hadısha Bókeeva atyndaǵy qazaq drama teatry ujymy sahnalaıtyn «Qadyr – Adam» atty qoıylymnyń premerasy da erteńge josparlanǵan.
Batys Qazaqstan oblysy
