Foto: gov.kz
Kóldi tazartýǵa Bacillus shtamdary negizinde daıyndalǵan qazaqstandyq ekologııalyq qaýipsiz bıopreparattary qoldanylǵan. Sý aıdynynyń jaǵalaý aýmaǵynn qoqystan tazalaýǵa «Astana Jastary» jastar qozǵalysynyń eriktileri men Qorǵanys mınıstrliginiń qyzmetkerleri atsalysqan.
Bul shara 2025 jyldan bastalǵan sý aıdyndaryn bıologııalyq ońaltý jobasynyń kezeń-kezeńimen atqarylatyn keshendi jumystarynyń bir bóligi.
Qazirgi ýaqytta №5 ýchaskede jumys júrip jatyr. Prosess uzaq ári bıopreparattardy turaqty engizýdi, sanıtarlyq sharalardy jáne sý sapasyna únemi monıtorıng júrgizýdi qajet etedi.
«Esterińizde bolsa, kóktemde kóldiń betinde gúldengen qabyq paıda bolyp, shirý prosesi júrip jatqan edi. Jaǵdaı shynynda kúrdeli boldy. Alaıda qazirgi qoldanylyp jatqan tehnologııalardyń nátıjesinde aıtarlyqtaı oń ózgeristerdi kórýge bolady. Bul – zamanaýı ádister men tabıǵı shirý prosesiniń arasyndaǵy «kórinbeıtin maıdan». Biraq nátıje bar: kóldiń jaǵdaıy jaqsara tústi», dedi Astana qalasynyń Qorshaǵan ortany qorǵaý jáne tabıǵatty paıdalaný basqarmasynyń bas mamany Rashıd Aıdar.
Kishi Taldykóldi tıimdi tazartý úshin suıyq konsentrat jáne zerthanada aldyn ala daıyndalatyn arnaıy bıo-sharlar paıdalanylǵan. Ár qoldanar aldynda sýdan synama alynyp, kóldiń sol ýaqyttaǵy jaǵdaıy taldanǵan.
