20 qyrkúıekte Dúnıejúzilik tazalyq kúni atalyp ótedi. «Jumysshy mamandyqtary alleıasynyń» ashylýy osy ataýly kúnmen tuspa-tus kelgen soń, jumysshylar men qala turǵyndary birlesip aǵash kóshetterin otyrǵyzdy. Onyń ishinde «Astana tazalyq» seriktestigi, qurylys kompanııalary, sýǵa, jylýǵa, jaryqqa jaýapty mekemeler, basqa da eńbek ujymdarynan uzyn-sany 500-ge jýyq jumysshy boldy. Alleıa Temirbek Júrgenov pen Maǵjan Jumabaev kóshesin jalǵaıdy. Aýdany – 1 ga. Negizi osy aýmaqqa jańa alleıa salý týraly usynysty qala ákimimen kezdesýde aýdan turǵyndary alǵa tartypty. Endi mine, turǵyndardyń tilegi oryndaldy. Saraıshyq aýdanynyń ákimi Maqsat Samatulynyń aıtýynsha, alleıany abattandyrýǵa úsh aıǵa jýyq ýaqyt ketken.
– Saraıshyq qaladaǵy eń jas aýdan bolǵanyna qaramastan, kórkeıip keledi. Búgin alleıaǵa 400-den astam aǵash kóshetteri, gúlzarlar egildi. «Taza Qazaqstan» aksııasy aıasynda apta saıyn senbilikter ótip turady. Turǵyndar da abattandyrýǵa, tazalalyqqa qol ushyn sozyp júr. Aýdanda jyl basynan beri 5000-ǵa jýyq aǵash egildi, taǵy 5 myń aǵashty jaqyn arada egemiz, – dedi Maqsat Samatuly.
Alleıany abattandyrýǵa kelgen jumysshylar qatarynda «Astana tazalyq» seriktestiginde júrgizýshi bolyp jumys isteıtin Qýanysh Nııazbek te bar.
– Tazalyqqa jaýapty mekemede 1999 jyldan beri jumys isteımin. Beride mekemeler jekeshelenip, «Astana tazalyq» seriktestigine óttik. Osynda júrip qum tógetin «ZIL», «KamAZ» kólikterin júrgizdim, qazir kóshe sypyratyn kólikti tizgindep júrmin. Eki kósheni jalǵaıtyn alleıa demde adam tanymastaı ózgerip shyǵa keldi. Alleıanyń ashylýy – jumysshy mamandyqtarynda ter tógip júrgen adamdarǵa qurmettiń belgisi, – dedi Qýanysh Nııazbek.
Turǵyndar bul kúni alleıa mańynda qaz-qatar tizilgen ǵımarattardyń qasbetinen jumysshy mamandyq ıelerine arnalǵan mýraldy, fotokórmeni, qurylys tehnıkalaryn tamashalady. Mereke aıasynda «Eńbek joly» baıqaýynyń jeńimpazdary marapattalyp, sońy konserttik baǵdarlamaǵa ulasty.
