Sýretti túsirgen – Erlan OMAR, «EQ»
Astanada jalpyhalyqtyq senbilik «Taza Qazaqstan. Astana – tazalyq pen tártiptiń úlgisi» ekologııalyq aılyǵy aıasynda ótti. Senbilikke 100 myńnan astam qala turǵyny, eńbek ujymdary, belsendi, bedeldi azamattar jumyldy. Olar 12 myńǵa jýyq aýlany tazalap, 2 myń tonna shamasynda qoqys shyǵardy. 162 saıabaq pen 41 tarıhı-mádenı mura nysanyn ajarlandyrýǵa kúsh salyp, 3 myńǵa jýyq aǵash ekti. Osy kúni qalada sanıtarlyq tazalaý jumysy qatar júrdi. Nóser, aryq jelileri, kóshe, júrginshiler joly men aýlalar tazartyldy. Aýlalarǵa balalarǵa arnalǵan oıyn, sport alańdary ornatyldy. Qoǵamdyq oryndardaǵy tas tósenishter, jıektas pen shaǵyn sáýlettik nysandar qaıta qalpyna keltirildi. Maýsymdyq agrotehnıkalyq jumystar da nazardan tys qalmady. Jasyl jelekterdi kútip-baptaý, saýda nysandarynyń mańyn tazalaý, ruqsatsyz qoqys úıindilerin joıý syndy jumys júrgizildi.
«Baıqońyr» aýdanyna qaraıtyn J.Táshenov kóshesiniń boıyndaǵy gúlzardy abattandyrýǵa 160 adam keldi. Olardyń arasynda elordadaǵy «Belsendi uzaq ómir súrý ortalyǵynyń» ardagerleri, «Baıqońyr» aýdany ákimi apparatynyń qyzmetkerleri, aýdannyń belsendi turǵyndary, Esil University men «Turan» kolledjiniń stýdentteri boldy. Jınalǵandar gúlzar aýmaǵyna 100 túp aǵash egip, qoqysyn tazalady. Burynyraqta gúlzardyń orny bos jatatyn, qazirde qylqan japyraqty aǵashtar, qaraǵaı, qaıyńy, ózge de kóshetteri jaıqalǵan jasyl aımaqqa aınalyp keledi. Kóktemde munda 500-den astam aǵash egilse, ótken aptada taǵy 50 aǵash otyrǵyzyldy.
Esil aýdanynyń «Prıgorodnyı» turǵyn alabynda aksııaǵa qatysýshylar 700-den astam aǵash ekti. Onyń ishinde qaraǵash, tal, terek, mamyrgúl, emen kóshetteri bar. Sharýany úılestirýge jergilikti turǵyndar, shaǵyn jáne orta bıznes, páter ıeleri kooperatıvteri, múlik ıeleri birlestikteri, densaýlyq saqtaý, sport, mádenıet, bilim salasynyń qyzmetkerleri, memlekettik organdar men qoǵamdyq uıym ókilderi, sportshylar, muǵalimder qatysty.
Sol sekildi L.N.Gýmılev atyndaǵy Eýrazııa ulttyq ýnıversıtetiniń 400 stýdenti «Jeruıyq» saıabaǵynda, qalanyń mádenıet basqarmasy, oǵan qarasty mekemelerdiń qyzmetkerleri E.Rahmadıev atyndaǵy memlekettik akademııalyq fılarmonııa aýmaǵynda, elorda sportshylary «Ǵashyqtar saıabaǵynda» tazalyq jumysyn júrgizdi. «Ǵashyqtar saıabaǵyndaǵy» senbilikke 100-den astam sportshy, bapker, sport mektepteriniń ujymdary qatysty. Olardyń arasynda bokstan eki dúrkin álem chempıony Sanjar Táshkenbaı, aýyr atletıkadan jastar arasyndaǵy Azııa chempıonatynyń kúmis júldegeri Ańsar Tursynbek, Azııa chempıony, birneshe dúrkin elimizdiń chempıony Venera Jaqsybaeva, Parıj Paralımpıadasynyń kúmis júldegeri Erǵalı Shámeı, Azııa chempıonatynyń kúmis júldegeri Nıkol Sengel syndy sańlaqtar boldy.
Elordada «Taza Qazaqstan. Astana – tazalyq pen tártiptiń úlgisi» uranymen ótip jatqan ekologııa aılyǵy 13 qyrkúıek – 11 qazan aralyǵynda jalǵasady. Ekoaksııanyń basty maqsaty – qala kósheleriniń tazalyǵyn saqtaýǵa qoǵam nazaryn aýdaryp, turǵyndar arasynda ekologııalyq mádenıet qalyptastyrý.
