Foto: admaer.ru
Qarbalas shaqta elordada eńserilip jatqan eńbek týraly aıtýǵa «Astana sý arnasy» mekemesiniń jetekshi jylý ınjeneri Maýlet Abdrahmanov az-kem ýaqytyn arnady. Sanaly ǵumyrynyń 38 jylyn jylý jelileriniń qaýipsiz ári qaltqysyz qyzmet etýine arnaǵan maman tarmaqtalǵan qubyrlardy birtutas adam aǵzasyna balaıdy. Salany tamyrshydaı tap biletin jetekshi jylý ınjeneriniń paıymdaýynsha, tánniń bir tusy syzdasa, tutas jan qalypty tynysynan aıyrylatynyndaı, bir jylý jelisinen aqaý shyqsa, ózge arnalarǵa da keri áserin baıqatpaı turmaıdy. Sondyqtan, adam balasy densaýlyǵyn ár mınýtta qýatpen qamtyp, aýrýdyń aldyn alý úshin qamdansa, jylý mamandary jyl on eki aı qubyrlardyń qysymyn, sý temperatýrasyn yjdaǵatpen baqylaıdy.
«Qarapaıym turǵyndar jylý mamandarynyń jumysy tek qysta ǵana qyzady dep jańsaq oılap jatady. Bul áste shyndyqqa janaspaıdy. «Qystyń qamyn jazda oılaıtyn» bir sala bolsa, ol jylýmen qamtý salasy. Sebebi kóktemde jylý maýsymy toqtatylǵanda-aq ár qubyrdyń jaıyn baǵamdaý, kelesi maýsymǵa jaramdylyǵyn bajaılaý ile-shala bastalady. Qazandyqtar men negizgi jabdyqtardyń jumys rıtmi de tııanaqty tekseriledi. Al jazda anyqtalǵan aqaýlardy jóndeý, qalpyna keltirý jumystaryna bilek sybana kiresemiz», degen Maýlet Aısanuly qysta turǵyndarǵa qolaısyzdyq týdyrmaý ár jumysshynyń maqsaty ekenin tilge tıek etti.
«Ala jazdaı tekken tórdiń jemisi qysta anyq kórinedi. Sondyqtan bizge jóndeý jumystaryn jazda 100 paıyzdyq deńgeıde aıaqtaý júkteledi. Al qysta qubyrdaǵy sý temperatýrasynyń shamadan tys qyzyp ketpeýin, olardyń úzdiksiz jumys isteýin qadaǵalaımyz. Jumys barysynda qysta qubyrlardan aqaý shyqqan kezder de kezdesti. Mundaı sátte turǵyndardy dereý qulaǵdar etip, sol aýmaqtaǵy qubyrlardy bekitip, sý temperatýrasyn túsirýge kúsh salamyz. Ýaqyt-saǵatpen sanaspaı jylý berilgenshe ter tógemiz», dedi «Astana sý arnasy» mekemesiniń jetekshi jylý ınjeneri.
Maýlet Aısanuly Astanadaǵy jańadan boı kóterip jatqan nysandaryn jylýmen qamtý baǵytyndaǵy esep tobynda da qyzmet atqarady. Keıipkerimiz nysannyń aýmaǵyna qaraı qazandyqtardyń ornalasý araqashyqtyǵyn anyqtaıdy. Ol buǵan deıin Jezqazan, Qaraǵandy qalalarynda tájirıbesin tolystyrǵan jylý ınjeneri retinde salanyń qyr-syryn meńgerý kóbirek talaptanýmen ýysqa túsetinin aıtty.
