Foto: Ashyq derekkóz
Jańa Salyq kodeksin túsindirýge arnalǵan semınarda baıandamashy QQS mólsherlemesi 16 paıyz bolyp belgilengenin eske saldy. Dárilik zattar, medısınalyq maqsattaǵy buıymdar men medısınalyq qyzmetter úshin QQS mólsherlemesi 2026 jyldan bastap 5% deńgeıinde belgilendi, al 2027 jyldan bastap 10% quraıdy.
«Tegin medısınalyq kómektiń kepildik berilgen kólemi jáne MÁMS aıasynda, sondaı-aq Úkimet aıqyndaıtyn tizbe boıynsha orfandyq jáne áleýmettik mańyzy bar aýrýlardy emdeý úshin dárilik zattardy ótkizý ári ımporttaý jáne medısınalyq qyzmetter QQS-tan bosatylady», dedi Jánibek Nurjanov.
Spıkerdiń málimetinshe, 2026 jyldan bastap turǵyn úıdi satý nemese jalǵa berý kezinde QQS-tan bosatý tártibi alynyp tastalady.
«Iаǵnı turǵyn úı salýmen aınalysatyn qurylys kompanııalary kelesi jyldan bastap óz aınalymdaryn QQS tólemderi retinde moıyndaýy tıis. Alaıda 2026 jyldyń 1 qańtaryna deıin bastalǵan qurylys nysandaryna qatysty jeńildik sońyna deıin, ıaǵnı tolyq ótkizilip bitkenge deıin saqtalady», dep naqtylady Jánibek Nurjanov.
Sonymen qatar ishki týrızm boıynsha týroperatorlardyń qyzmetteri, otandyq kitaptardy satý, baspa túrinde kitap shyǵarý qyzmetteri jáne arheologııalyq jumystar QQS-tan bosatylady.
«Sondaı-aq arnaıy salyqtyq rejım qoldanylatyn taýarlar men qyzmetterdiń aınalymy QQS obektisi bolyp tanylmaıdy. Demek, arnaıy rejımde jumys isteıtin kásipkerler QQS tóleýshilerdiń qataryna kirmeıdi», dedi Qarjy mınıstrligi Memlekettik kirister komıteti tóraǵasynyń orynbasary.
