Foto: Qorǵanys mınıstrligi
Jarys segiz kezeńnen turdy. Áskerı qyzmetshiler jeke jáne komandalyq esepte baq synap, jaýyngerlik daıyndyq, dene shynyqtyrý, taktıkalyq jáne zııatkerlik qabiletteri boıynsha baǵalandy.
Qazaqstan Qarýly kúshteriniń Bas serjanty, sheber-serjant Temirbek Halyqovtyń aıtýynsha, bıylǵy baıqaýdyń basty ereksheligi – taktıkalyq medısına elementterin qoldaný.
«Bıylǵy jıynnyń ereksheligi taktıkalyq medısına elementterimen naqty urys jaǵdaıyn modeldeıtin ssenarıılerdi pysyqtaý, taýly nemese joǵarǵy relefti jerde baǵdar tabý, bólimshe quramynda urys júrgizý boldy», dedi QR QK Bas serjanty sheber-serjant Temirbek Halyqov.
«Aıbyn» áskerı-sporttyq kópsaıysynda Desanttyq-shabýyldaý áskerleri 48386 áskerı bóliminiń serjanty Jandarbek Isabekov jeke esepte úzdik shyqty.
«Baǵdar» nomınasııasynda 14776 áskerı bóliminiń aǵa serjanty Bekzat Ájiǵalıev topografııalyq kartamen jumys isteý jáne marsh kezinde baǵdarlaý boıynsha jeńimpaz atandy.
Taktıkalyq medısınaǵa arnalǵan «Járdem» kezeńinde «Ońtústik» óńirlik qolbasshylyǵy 66597 áskerı bóliminiń 2-synypty serjanty Almat Amanbaev úzdik atandy.
Kedergiler jolaǵynan ótýge negizdelgen «Qaısar» saıysynda 18404 áskerı bóliminiń serjanty Jandos Raqymǵazy erekshe nátıje kórsetti. Ol 15 kelilik júkpen 21 shaqyrymdyq marshty 2 saǵatta eńserip, rekord ornatty. Zııatkerlik jarys «Bilimpazda» Áskerı polısııa bas basqarmasynan kelgen serjant Ermek Júnisov jeńimpaz boldy.
«Mergen» kezeńinde 14776 áskerı bóliminiń serjanty Danııar Saparalıev oq atý boıynsha úzdik atqysh atandy. Al «Kerýen» taktıkalyq daıyndyq saıysynda «Batys» óńirlik qolbasshylyǵy 30238 áskerı bóliminiń serjanty Tileýbaı Mahambetov jeńiske jetip, «Jekpe-jekte» de qarsylastarynan oq boıy ozyp shyqty.
Jalpykomandalyq esepte Desanttyq-shabýyldaý áskerleriniń komandasy top jarsa, ekinshi oryn 14776 áskerı bólimine buıyrdy. Úzdik úshtikti «Batys» óńirlik qolbasshylyǵy túıindedi. Baıqaýdyń absolıýtti jeńimpazy bolyp 18404 áskerı bóliminiń serjanty Jandos Raqymǵazy tanylyp, «Ásker tuǵyry» ataǵyn ıelendi.
Uıymdastyrýshylardyń aıtýynsha, XV Búkilarmııalyq baıqaý serjanttardyń kásibıligin aıqyndap qana qoımaı, tájirıbe almasýǵa, taktıkalyq mashyqtaryn shyńdaýǵa jáne jaýyngerlik rýhty kóterýge yqpal etti.
