Foto: Ashyq derekkóz
Depýtat Bekbol Orynbasarovtyń aıtýynsha, Hattama 2023 jylǵy 25 jeltoqsanda Sankt-Peterbýrgte EAEO memleketteri basshylarynyń qol qoıýymen bekitilgen. Qujattyń negizgi maqsaty – syrtqy elektrondy saýdany quqyqtyq turǵydan retteý. Bul baǵyt sońǵy jyldary turaqty ósim kórsetip otyr: tek 2024 jyldyń ózinde Qazaqstandaǵy elektrondy saýda kólemi 3,2 trln teńgege jetken.
Hattama EAEO-ǵa múshe barlyq memleketter – Reseı, Belarýs, Qyrǵyzstan jáne Armenııa tarapynan ratıfıkasııalandy.
Qujatta elektrondyq saýda taýarlaryn jetkizýdi júzege asyratyn poshta operatory — «elektrondy saýda operatory» uǵymyn engizý qarastyrylǵan. Sondaı-aq kedendik deklarasııanyń jańa túrin — elektrondyq saýda deklarasııasyn engize otyryp, elektrondy saýda taýarlarynyń barlyq kólemin kedendik deklarasııalaý kózdelgen.
Qazirgi erejeler boıynsha, shetelden jeke tulǵalarǵa keletin taýarlar tek 200 eýro nemese 31 kg-nan asqan jaǵdaıda ǵana deklarasııalanady. Mundaıda alýshy ózi qujat rásimdep, 15% kedendik tólem tóleıdi. Al belgilengen shekten tómen taýarlar esepke alynbaıdy. Jańa talaptarǵa sáıkes, endi barlyq taýarlar deklarasııalanady. Bul statıstıkany naqty júrgizýge múmkindik beredi. Deklarasııany operator da, taýar alýshy da toltyra alady.
