– Asqarbek Maratuly, jyl saıyn qyrkúıek aıynyń sońǵy jeksenbisi eńbek kúni retinde atalyp ótiledi. Eńbek ardagerleri men ozattarǵa qurmet kórsetiledi. Aq adal eńbegimen eldiń órkendeýine úles qosyp júrgen azamattar árdaıym marapatqa laıyq.
– Durys aıtasyz, 2014 jyldan beri qyrkúıek aıynyń sońǵy jeksenbisi Eńbek kúni merekesi toılanyp, atalyp ótedi. Mundaı mereke, ıaǵnı eńbek adamdaryn qurmetteý álemniń 100-den astam elinde bar. Eńbek jáne halyqty áleýmettik qorǵaý mınıstrligi ataýly kásibı merekege oraı jylda respýblıkalyq forým uıymdastyrady. Bıyl da bul ıgi bastama jalǵasyn taýyp, 27 qyrkúıekte aýqymdy is-shara bolady. Forým aıasynda uzaq jyl jemisti jumys istep, zeınetkerlikke shyqqan eńbek ardagerleri, óz salasynyń ozattary, bilikti tálimgerler memlekettik nagradalarmen marapattalady.
– Osy jyldyń basynda «Eńbek joly» konkýrsy bastalyp edi. Qorytyndysy qashan jarııalanady?
– Bul konkýrs eki kezeńde uıymdastyrylady. Aldymen 17 oblys, 3 qalada irikteý ótti. Jergilikti atqarýshy organdar shilde aıyna deıin ár aımaqtaǵy irikteý kezeńin ótkizdi. Konkýrs jeńimpazdary úsh nomınasııa boıynsha anyqtalady. «Úzdik eńbek dınastııasy» atalymynda ár saladaǵy óz mamandyǵyn ǵasyrdan jalǵap, ákeden balaǵa mıras etip kele jatqan jandar marapattalady. «Úzdik tálimger» nomınasııasynda jastardy eńbekke baýlyp júrgen tálimgerlerdiń arasynan dara shyqqandary qurmetke bólenedi. Al «Úzdik jas óndiris jumyskeri» atalymynda ataýy aıtyp turǵandaı, óndiris salasyndaǵy daryndy jastardyń alǵyrlyǵy, biliktiligi baǵalanady. Jalpy bıylǵy konkýrsqa 505 ótinim tústi. Solardyń arasynan iriktelgen 66 úmitkerdiń eńbekteri respýblıkalyq komıssııanyń qaraýyna jiberildi. Eńbek jáne halyqty áleýmettik qorǵaý mınıstrligindegi respýblıkalyq komıssııa onyń ishinen 20 úmitkerdiń ótinimin iriktep alady. Komıssııa quramynda mınıstrlik ókilderi, Parlament depýtattary, qaýymdastyqtyń ókilderi, áleýmettik saladaǵy uıymdardyń mamandary bar. Jeltoqsan aıynda «Jumysshy mamandyqtar jylyn» qorytyndylaý sharasynda osy konkýrstyń jeńimpazdary da anyqtalyp, marapattalady.
Áńgimelesken –
Qýanysh Nurdanbekuly,
«Egemen Qazaqstan»
