Búginde ınfeksııanyń 33 túri boıynsha jaǵdaı tómendegen. A vırýstyq gepatıti — 2,5 ese, koronavırýs ınfeksııasy — 1,6 ese, lıamblıoz — 32%, askarıdoz — 21%, salmonellez — 7% azaıǵan. Týberkýlezben syrqattanǵandar 12,6% , onyń ishinde tynys alý organdarynyń týberkýlezimen – 11,5% - ǵa, bakterııa bólýmen-4,14% - ǵa tómendegeni baıqalǵan. Sol sekildi qyzylsha men kókjótel boıynsha syrqattanýshylyqty tómendetý boıynsha oń dınamıka baıqalypty. Máselen, aǵymdaǵy jyldyń 8 aıynda qyzylshamen aýyrǵandar ótken jyldyń sáıkes kezeńimen salystyrǵanda 91%-ǵa tómendedi. О́kinishke qaraı, aýrýdyń osy túri bes jasqa deıingi balalar arasynda áli de tirkeledi. Olardyń 75%-y ekpe almaǵan. Kókjótelge keletin bolsaq, onyń jıiligi ótken jyldyń sáıkes kezeńimen salystyrǵanda 8 ese azaıǵan. Naýqastardyń 87%-yn 5 jasqa deıingi balalar quraıdy, olardyń 90%-y vaksına saldyrmaǵan. Densaýlyq saqtaý mınıstrligi sanıtarlyq-epıdemıologııalyq baqylaý komıtetiniń tóraǵasy Sarhat Beısenova epıdemıologııalyq jaǵdaıdy turaqtandyrý boıynsha epıdemııaǵa qarsy is-sharalar jalǵasyp jatqanyn aıtty.
«Qyzylshaǵa qarsy 191 myńnan astam bala, kókjótelge, dıfterııaǵa, sirespege qarsy — 235 myńnan astam bala ımmýndaýmen qamtyldy. Aǵymdaǵy jyldyń 8 aıynda josparly ımmýndaý sheńberinde: qyzylshaǵa, qyzamyqqa jáne parotıtke qarsy — 1 jastaǵy 220 519 bala jáne 6 jastaǵy 225 734 balaǵa ekpe salyndy. Kókjótelge qarsy ekpelerdi 1 jasqa deıingi 200 131 bala, 1 jastaǵy 216 625 bala jáne 6 jastaǵy 215 163 bala aldy. Qazirgi ýaqytta epıdemıologııalyq jaǵdaıdy tolyq turaqtandyrý úshin kózdelgen jastaǵy balalardy vaksınalaýmen qamtý qajet. Osyǵan baılanysty bas memlekettik dáriger balalardyń ata-analaryna úndeý tastady. Vaksınalaý – balany qyzylsha men kókjótel sııaqty juqpaly aýrýlardan qorǵaýdyń eń senimdi jáne dáleldengen ádisi. Vaksınalaý arqyly biz qoǵamdyq ımmýnıtetti qalyptastyra alamyz jáne medısınalyq sebeptermen ekpe saldyra almaıtyndardy qorǵaı alamyz», deıdi Sarhat Beısenova.
Qoryta kele aıtar bolsaq, elde qoldanylatyn vaksınalar Dúnıejúzilik densaýlyq saqtaý uıymynyń halyqaralyq standarttary men usynystaryna sáıkes keledi. Vaksınalar qoldanysqa berilmes buryn qatań sapa men qaýipsizdik baqylaýynan ótedi.
