Oblystyq aýyl sharýashylyǵy basqarmasynyń málimetine qaraǵanda, gektar berekesi 15,6 sentnerden aınalýda. Bıdaıdyń 70 paıyzdan astamy úshinshi synypqa sáıkes keledi.
Joǵary qarqynǵa memlekettik qoldaý sharalary men agrosektorǵa zamanaýı tehnologııalardy engizý yqpal etti. 2025 jyly mıneraldy tyńaıtqyshtardy engizý kólemi úsh esege artyp, 336 myń tonnany qurady. Maıly daqyldardyń egis kólemi alǵash ret 495 myń gektardan asyp otyr, al eki jyl buryn bul kórsetkish 200 myń gektardan tómen bolatyn.
Tehnıka parkin jańartýǵa da erekshe kóńil bólindi. Jyl basynan beri aýyl sharýashylyǵy taýaryn óndirýshiler 1400-den astam aýyl sharýashylyǵy tehnıkasyn satyp aldy, bul 2024 jylǵy deńgeıden bir jarym ese kóp. Naýqanǵa 7 myńnan astam kombaın jumyldyrylǵan, olardyń 5 myńǵa jýyǵy – zamanaýı ári joǵary ónimdi mashınalar. Bul jınaý qarqynyn arttyrýǵa jáne ónim shyǵynyn azaıtýǵa múmkindik berdi.
Naýqandy senimdi ótkizýge memlekettik qoldaý da óz áserin tıgizýde. Dıqandarǵa 94 myń tonnadan astam jeńildetilgen dızel otyny belgilengen baǵamen bólindi. Jetkizilim qatań keste boıynsha júrgizilýde, janar-jaǵarmaımen qamtamasyz etýde qıyndyqtar tirkelgen joq. Astyqty 4,3 mıllıon tonna syıymdylyǵy bar 66 lısenzııalanǵan elevator, sondaı-aq aýyl sharýashylyǵy taýaryn óndirýshilerdiń 2,9 mıllıon tonnaǵa shaqtalǵan shamamen 1,5 myń qoımasy qabyldap jatyr. Jalpy saqtaýdyń qýattylyǵy 7 mıllıon tonnadan asady. Dándi keptirýge táýligine 230 myń tonnadan astam ónim óńdeı alatyn 264 keptirgish qondyrǵy tartylǵan.
Aqmolalyq dıqandar egin oraǵyn jaqsy nátıjemen aıaqtamaq.
Aqmola oblysy.
