Jańa saıabaq – óńir turǵyndarynyń demalys pen bos ýaqytyn tıimdi ótkizýine arnalǵan jańa mádenı-áleýmettik keńistik. Munda avtomatty sýarý júıesi ornatylyp, ásem gazon tóselgen. Balalar úshin arnaıy oıyn alańy, «workout» aımaǵy, shaǵyn fýtbol alańy, velojol jáne jaıaý júrginshilerge arnalǵan joldar qarastyrylǵan. Sonymen birge demalys oryndyqtary men zamanaýı jaryq shamdary ornatylyp, saıabaq túngi ýaqytta da jaıly ári qaýipsiz bolmaq.
«Eń basty jańalyqtyń biri – qalada tuńǵysh ret ornatylǵan erekshe oıyn kesheni. Dekoratıvti elementteri bar alyp «Fregat» keme túrindegi balalar alańy baldyrǵandardyń qııalyn sharyqtatyp, olardyń oıynyna jańa serpin beredi. Kúz aıynda saıabaq aýmaǵyna óńirdiń tabıǵatyna beıimdelgen 200-den astam japyraqty jáne qylqan japyraqty aǵash otyrǵyzamyz. Bul jasyl jelek bolashaqta saıabaqty naǵyz tynys alatyn aımaqqa aınaldyrmaq», deıdi qala ákimi Ernat Bázil.
Keıingi jyldary Taldyqorǵanda abattandyrý men kógaldandyrýǵa aıryqsha kóńil bólindi. Bıyldyń ózinde birneshe aýqymdy joba júzege asyp otyr. Qarasha aıynda «Birlik» shaǵyn aýdanynda jańa gúlzar qurylysy aıaqtalyp, paıdalanýǵa beriledi. Sonymen qatar «Jastar» saıabaǵy qaıta jańǵyrtylyp, «Jeńis» saıabaǵynyń kireberis stellasy jóndelip jatyr. Al qalanyń eń kórnekti oryndarynyń biri – ortalyq saıabaqqa Qabanbaı batyr kóshesi jaǵynan jańa sáýletti arka ornatylmaq.
Bul jumystyń barlyǵy Taldyqorǵannyń kórkin ashyp qana qoımaı, turǵyndardyń bos ýaqytyn mádenıetti ári jaıly ótkizýine múmkindik beredi.
Jetisý oblysy
