Sýret: gov.kz
«Desentrathon» hakatony elimizde osymen tórtinshi ret ótkizilip otyr. Alǵashqy jyly 12 qala qamtylsa, bıyl 20 qalanyń qatysýshylary baq synady. Jeńimpazdarǵa qomaqty syıaqy qarastyrylǵan. Máselen, «Solana Foundation» – 20 myń dollar, «Indrive» – 20 myń dollar, al «Bank SentrKredıt» 10 myń dollar kóleminde júlde tikti.
Osy jobaǵa qatysýshy Azamat Jeńisovtiń aıtýynsha, jasandy ıntellekt salasynda qazaq tilin damytýǵa baǵyttalǵan jobalardy qolǵa alý óte mańyzdy.
«Qazir jasandy ıntellekt boıynsha magıstratýrada oqyp jatyrmyn. «Astana Hub» aıasyndaǵy «Tomorrow school» mektebiniń túlegimin. Ol jaqta 24 saǵattyq ashyq ınfraqurylym, tegin kýrstar bar. Bul qoldaý jastardy IT salasyna tartýǵa aıryqsha yqpal etip otyr. О́zim de jasandy ıntellekt salasynda myqty maman bolýdy maqsat ettim. Eger osy hakatonda jeńimpaz atansam, startap qurý oıymda bar. Ásirese qazaq tilin damytýǵa baǵyttalǵan jobalardy qolǵa alǵym keledi. Mysaly, qazaqsha sóıleýdi tanıtyn, sóıleý arqyly til úıretetin qosymshalar áli de kemshindeý. Naqtyraq aıtsam, «Duolingo» qosymshasyn qazaqsha sóıletkim keledi», deıdi A.Jeńisov.
Bıylǵy jıynǵa IT mamandyǵynda oqyp júrgen stýdentterden bólek, mektep oqýshylary men tájirıbeli ınjenerlerge deıin qatysty. Osy hakaton barysynda paıda bolǵan tyń ıdeıalar men sheshimder keıin seriktes kompanııalardyń jumystaryna engizilýi múmkin. Sondyqtan bul is-shara – elimizdegi tehnologııalyq qoǵamnyń damý deńgeıin kórsetip qana qoımaı, jańa startaptar men ınnovasııalyq ónimderdiń paıda bolýyna jol ashady. Osy alańda qatysýshylar bir-birimen básekege túsip, tájirıbeli mentorlardan keńes alyp, jobalaryn salalyq sarapshylarǵa usynady. Úzdik dep tanylǵan komandalar elimizdegi eń basty tehnologııalyq alań – «DigitalBridge – 2025» halyqaralyq konferensııasynda óz jobalaryn áleýetti ınvestorlar men seriktesterge tanystyrý quqyǵyna ıe bolady.
Aıta keteıik, hakatonǵa qatysýshylar baǵdarlamalaý salasynda ǵana emes, bıznes-ıdeıa, marketıng, qarjylyq saýattylyq, jobany basqarý sııaqty baǵyttarda da bilimin shyńdaıdy. Mundaı keshendi tájirıbe bolashaq IT-kásipkerler men startapshylarǵa berilgen taptyrmas múmkindik ekeni sózsiz.
