«Kóktal» saıabaǵynan bastalatyn júgirý Qorǵanys mınıstrligi ǵımaratynyń janynda aıaqtalady. Marafon Astana – Kókshetaý – Astana baǵyty boıynsha ótedi. Kún saıynǵy qashyqtyq — 120 shaqyrym. Ár 40 shaqyrym saıyn demalys qarastyrylǵan.
«Oǵan daıyndyq úshin eki aı berdik. Raýan kún saıyn 40 shaqyrymnan artyq júgirdi», dedi elorda aýmaqtyq qorǵanys brıgadasynyń komandıri polkovnık Omar Orynbaev.
Ábilhanov bul rekordyn Respýblıka kúnine arnamaq. Sonymen qatar, ol aldaǵy ýaqytta Qaraǵandy tas joly arqyly Balqashqa deıingi 1000 shaqyrymdy 10 kúnde eńserýdi josparlap otyr.
World Book of Records (álemdik rekordtar kitaby) uıymynyń dıvızıon generaly Qýanysh Qudaıbergenovtiń aıtýynsha, bul júgiristi biregeı dep ataýǵa bolady.
«Ábilhanov — shetelderge de tanymal eń daıyn ýltramarafonshylardyń biri», deıdi ol.
Marafonshynyń ár qadamyn tanymal Strava qosymshasy tirkeıtin bolady. Al nátıjesi Qazaqstan rekordtar kitabyna enedi.
Serjant Ábilhanov Qarýly kúshter qatarynda 20 jyldan astam ýaqyt qyzmet etip keledi. Sportpen 15 jyldan astam ýaqyt aınalysý ústinde. Ol 2022 jyly Almaty oblysynda 48 saǵat ishinde 350 shaqyrym júgirip, rekord ornatqan bolatyn.
42 jastaǵy áskerı qyzmetshi tek rekord ıesi ǵana emes, sonymen qatar naǵyz úlgi tutar otbasy. Sportshy jubaıymen ekeýi segiz qyz, bir ul tárbıelep otyr.
