«SMART TjKB» biryńǵaı aqparattyq júıesi ázirlenip, ol qashyqtan oqytý platformasyn, bilim berý baǵdarlamalarynyń reestrin, TjKB kartasyn jáne «Qazaqstannyń TOP-100 stýdenti» jobasyn bir platformaǵa biriktiredi. Júıe ulttyq bilim berý derekter qorymen ıntegrasııalanyp, statıstıkalyq derekterdi jınaý men taldaýdy avtomattandyrýǵa múmkindik beredi. Jańa júıeni tolyq engizý 2027 jylǵa josparlanǵan.
Sıfrlyq ınfraqurylymdy damytýmen qatar, oqý prosesine jasandy ıntellektke negizdelgen quraldar engizilmek. «Bilim berý baǵdarlamalarynyń reestri» júıesin jedel jańartyp otyrý úshin JI tehnologııalary qoldanylatyn bolady. 2026–2027 jyldary iske qosylýy josparlanǵan ıntellektýaldy «konstrýktor» memlekettik standarttar, kásibı talaptar jáne eńbek naryǵy suranysyna sáıkes bilim baǵdarlamalaryn avtomatty túrde ázirleýge múmkindik beredi.
Sonymen qatar talapkerlerge AI-assıstent usynylady. Vırtýaldy kómekshi mamandyqtar jóninde jekelendirilgen aqparat berip, oqý ornyn nemese kásibı baǵytty tańdaýǵa kómektesedi, suraqtarǵa naqty ári ınteraktıvti jaýaptar usynady. Osylaısha, bolashaq stýdentter men olardyń ata-analary táýlik boıy qoljetimdi, túsinikti ári senimdi aqparat alý múmkindigine ıe bolady.
