• 19 Aqpan, 2015

Aqparattar aǵyny

210 ret

kórsetildi

3 mın

oqý úshin

Egemen Qazaqstan

*Byltyr sharýalardyń tuqym satyp alýyna 832,7 mln. teńge bólindi. Azyq-túlik kelisimshart korporasııasy habarlaǵandaı, 2015 jyldyń 17 aqpanyndaǵy jaǵdaı boıynsha qurylymǵa Qostanaı jáne Soltústik Qazaqstan oblystarynyń agrarıılerinen jalpy somasy 1,5 mlrd. teńgeden astam 136 ótinim kelip túsken. *Elimizde bólshek saýda kólemi 4,7 paıyzǵa joǵarylady. Statıstıka komıteti baspasóz qyzmetiniń dereginshe, azyq-túlik emes taýarlardyń ótkizilýi ótken jyldyń tıisti kezeńimen salystyrǵanda, 6,4 paıyzǵa ósken. Al 2015 jyldyń 1 aqpanynda bólshek saýdamen aınalysatyn kásiporyndardyń taýar qorlarynyń kólemi 296,2 mlrd. teńgeni quraǵan. *О́tken jyly tehnıkalyq jáne kásibı bilim berý uıymdary túlekteriniń 70 paıyzy eńbekpen qamtyldy. «Kásipqor» holdınginiń basqarma tóraıymy Eldana Sádýaqasova jyl saıyn kásiporyndar ózderine is-tájirıbege túlekter tartý úshin kolledjdermen kelisim-shart jasaıtynyn málimdedi. Aıta keteıik, elimizdegi 820 kolledjdiń 280-inde dýaldy bilim berý júıesi engizilgen, 280 myńnan astam jumys orny kolledj stýdentteri úshin praktıkalyq sabaqtar aıasynda usynylady. *Almaty oblysyndaǵy Toqjaılaý polıtehnıkalyq kolledjine tıisti qoldaý kórsetildi. Alakól aýdanyna qarasty Toqjaılaý aýylyndaǵy atalmysh bilim oshaǵynda 50 oryndyq jataqhana men 48 oryndyq sheberhanalar kesheni paıdalanýǵa berildi. Munda barlyq qajetti jaǵdaılar jasalǵan. Jobanyń jalpy quny – 530 mln. teńge. *Qaraǵandy oblysyndaǵy «Jeńis» JShS jylyna 130 tonna qoı etin óndire alady. Jańaarqa aýdanyna qarasty seriktestikte 17 myń asyltuqymdy qoı bar. О́tken jyly kásiporyn 3 jańa baza saldy, sondaı-aq, 1000 qoı men 150 jylqyǵa arnalǵan bordaqylaý alańy iske qosyldy. Aýyl sharýashylyǵy ǵylymdarynyń doktory, professor Tóleýhan Sádiqulovtyń sózine qaraǵanda, elimizde qoıdyń jeti túri bar eken. Sonyń beseýi Qaraǵandyda ósiriledi. *Shymkentte aıaqkıimder shyǵaryla bastady. Qaladaǵy aıaqkıim fabrıkasynyń dırektory Sanjar Tilegenov málim etkendeı, kásiporyn sheberleri úıde kıetin súıretpeniń 40 myń jubyn tigip úlgeripti. Olar eki maýsym boıynsha aıaqkıim shyǵarýdy josparlap otyr. Alǵashqy kezeńin júzege asyrǵan kásipker daıyn ónimin elimizdiń ózge de qalalaryna satýda. Kásipker memleketten alǵan nesıesin qaıtaryp úlgergen. *Qyzylorda oblysynda jyl ishinde 13 myńnan astam adam kásipkerlikke bet burdy. Aımaq basshysy Qyrymbek Kósherbaev ótken jyly «Bıznestiń jol kartasy» sheńberinde kásipkerlerdi qoldaýǵa 1 mlrd. 400 mln. teńge bólingenin jetkizdi. Qazirgi tańda oblys kásipkerlikti damytý úrdisi boıynsha aımaqtar arasynda 1-orynda. Ekonomıkadaǵy qıyndyqtarǵa qaramastan, bankter kásiporyndarǵa 2013 jylmen salystyrǵanda, 20 paıyzǵa artyq nesıe bergen. *Soltústik Qazaqstanda «Rostan» fırmasynyń maı zaýyty jyl basynan beri 14 mln. teńgeniń ónimin shyǵardy. Aqqaıyń aýdanyndaǵy kásiporyn aımaqtaǵy eń ozat kásiporyndarynyń biri. Ol elimizdegi taýar óndirýshiler naryǵynda 17 jyl boıy jumys istep keledi. «Altyn sapa», «Qazaqstannyń úzdik taýary» respýblıkalyq baıqaýlarynyń júldesin 4 jyl boıy qatarynan ıelengen. Onda 50 adam eńbek etedi. Habarlar Úkimet, oblystyq ákimdikter saıttary, «QazAqparat» agenttigi jáne «24kz» telearnasy derekteri boıynsha daıyndaldy.