Bizge belgili kókpardyń kóptegen túri bar. Atap aıtqanda: jappaı tartý, utysyp tartý, doda kókpar, aınalma kókpar, máre kókpar, taqym tartys t.b. Sondaı-aq kókpardyń atalǵan túrlerine qatysty jeke-jeke erejeleri bolǵan nemese kókparshylar oıyn ústinde jaǵdaıǵa qaraı kelisip alatyn da úrdis bar. Biraq bul birtekti emes úrdis ár ólkede árqıly túrleri kezdese beredi.
Mysaly, jappaı tartýdy alatyn bolsaq, bul oıyn túrinde kári-jas, úlken-kishi deıtin shekteý joq. Barlyq adam qatysatyn bolǵandyqtan joǵarydaǵydaı ataýǵa ıe. Kókparshylardyń taqym kúshin, eptiligin, qol qaıratyn talap etetin bul kókpardyń ereksheligi barlyq óńirge tán ekendiginde.
Utysyp tartý. Oıynshylar eki topqa bólinedi. Eki jaqtan bir-bir adam shyǵyp kókpardy tartady. Kókpardan aıyrylǵan nemese utylǵan adam oıynnan shyǵady. Keı jaǵdaıda ózine sengen kókparshy qarsylastaryn jeke-jeke saıysqa shaqyryp, bir ózi bárin jeńip oıynnan shyǵaryp tastaıtyn kezderi bolǵan. Nátıjesinde, qarymy myqty, kúshine aty saı jigit iriktelip jeńiske jetedi.
Aınalma kókpar. Buny keı óńirlerde «shaýyp tartý» dep te ataıdy. Oıynshylar kókpardy naqty mejelengen jerge (aýylǵa, jeke úıge, nysanaly orynǵa, t.b.) jetkizip tastaýy kerek. Ekinshi jaq olardy jibermeı qarsylyq kórsetedi. Qarsylastarynan aılasyn asyryp, nysanaǵa kókpardy aparyp tastaǵan adam syılyqqa ıe bolady.
Máre kókpar. Oıynǵa qatysýshylar eki shetten nysana nemese qazandyq belgilep, qaı jeńgeni kókpardy sol qazandyqqa salyp, upaı jınaıdy. Osylaı mejelengen ýaqytta qaı top kóp upaı jınaıdy, solar jeńiske jetedi. Qazirgi kókparshylar osy máre kókpar túrinen saıysyp júr.
Jalpy, kókpar oıyny toptasqan jigitterdiń birligi men eptiligin qajet etedi. Erterekte kókparshylar aýyl, ata, rý bolyp toptasyp, ekinshi rý, ata, aýyldyń azamattarymen saıysatyn. Rýdyń azamattary qarsylastarynan jeńilip qalmaý úshin árkez daıyndalyp, únemi mashyqtanǵan. Qazaqta: «Kókpar tartqandiki, qoıan qaqqandiki» dep tegin aıtylmaǵan.
