Kórmede Departamenttiń baspasóz qyzmeti muraǵatynan alynǵan 30-dan astam fotosýret qoıyldy. Ekspozısııaǵa «Arlan» arnaıy jasaq sarbazdarynyń, patrýldik polısııanyń jáne ózge de bólimshelerdiń qyzmet barysyndaǵy biregeı sátteri endi. Árbir sýret quqyq qorǵaý organdary jumysynyń shynaıy ári kópshilikke beımálim tustaryn pash etedi.
Sonymen qatar, is-shara barysynda esirtki qylmysyna qarsy is-qımyl basqarmasy men jergilikti polısııa qyzmetiniń mamandary turǵyndarmen profılaktıkalyq áńgimeler ótkizip, nashaqorlyqtyń jáne turmystyq zorlyq-zombylyqtyń aldyn alý máselelerine toqtaldy.
— Kórmeniń basty maqsaty — Zańǵa jáne ony kúndelikti eńbegimen qorǵap júrgen adamdarǵa qurmetti arttyrý. Bul fotosýretter 2005 jyldan bergi polısııa qyzmetiniń mańyzdy sátterin beıneleıdi. Biz «Zań men tártip» qaǵıdasynyń mán-mańyzyn aıqyn kórsetetin eń úzdik kadrlardy tańdadyq. Qonaqtardyń pikirine qaraǵanda, jumystar kórermenderge erekshe áser qaldyrdy, — dedi PD baspasóz qyzmetiniń erekshe tapsyrmalar jónindegi aǵa ınspektory Batyrhan Smaılov.
Qala turǵyny Ernar Raqyshev óz áserimen bólisti.
— Fotokórme joǵary deńgeıde uıymdastyrylǵan. Bul sýretter polısııa qyzmetiniń ádette kópshilikke kórinbeıtin qyrlaryn kórsetti. Osyndaı eńbekke qurmetpen qaraýǵa jáne senim artýǵa bolady. Polısııa qyzmetkerlerine tabys tileımin.
