Aqmola oblystyq energetıka jáne turǵyn úı-kommýnaldyq sharýashylyǵy basqarmasynyń málimetinshe, bıyl bes mańyzdy nysan paıdalanýǵa berilmekshi. Olar Kókshetaýdaǵy kúl úıindisi, avtomattandyrylǵan monıtorıng júıesi jáne tehnologııalyq prosesterdi basqarý júıesi, sondaı-aq, Aqkólde tórt turǵyn úıge arnalǵan qazandyq jáne Ereımentaýdaǵy №5 qazandyqtyń rezervtik jelisi. Nátıjesinde 8 myńnan astam abonent sapaly jylýmen qamtylady.
Budan bólek, oblysta Aqkól, Egindikól, Shortandy aýdandarynda jáne Qyzyljar aýylynda tórt blok-modýldi qazandyqty ornatý josparlanǵan. Onyń ekeýi paıdalanýǵa berildi, qalǵan ekeýi tórtinshi toqsanynda aıaqtalady. Qazandyq agregattaryn jyl saıyn jańartý baǵdarlamasy da oryndaldy. О́ńirde 90 kommýnaldyq qazandyq jumys isteıdi, onda shamamen 300 bý qazandyǵy bar. Bıyl 59 jabdyqty aýystyrý josparlansa, olardyń barlyǵy derlik ornatyldy, tek Arshaly aýdanyndaǵy úsh qazandyq jaqyn ýaqytta iske qosylady.
Sonymen qatar, Arshaly, Astrahan, Egindikól, Ereımentaý jáne Jarqaıyń aýdandarynda uzyndyǵy 9,7 shaqyrym jylý jelilerin jóndeý jumystary da aıaqtaldy. Bul jumystar tolyq kóleminde oryndaldy. Kókshetaý, Stepnogorsk jáne Atbasar qalalarynda jalpy uzyndyǵy 17,2 shaqyrym jylý jelilerin qaıta qurý jumystary jalǵasýda. Qazirgi tańda Kókshetaýda Saın jáne Potanın kóshelerinde bul jumys tolyq aıaqtaldy, Atbasarda 1 shaqyrymnan astam ýchaskede jóndeý júrgizildi, Stepnogorskide magıstraldyq jelilerdiń 15 shaqyrymnan astamy jańartylyp, jóndeldi.
Mamandardyń esebinshe, atqarylǵan jumystar jylý jelileriniń tozýyn 39 paıyzdan 37 paıyzǵa deıin tómendetýge múmkindik beredi. Energetıka jáne turǵyn úı-kommýnaldyq sharýashylyǵy atap ótkenindeı, jylý berý maýsymyna daıyndyq barysyna turaqty túrde monıtorıng júrgizilýde. Qabyldanǵan bul sharalar jylytý kezeńiniń oıdaǵydaı ótýine ıgi yqpalyn tıgizeri sózsiz.
Aqmola oblysy.
