Sondaı-aq qazirgi tańda suıytylǵan munaı gazyn satý qyzmeti básekelestik ortaǵa berilgenin eskersek, oblysta gaz qondyrǵysymen jabdyqtalǵan kólikterdiń sany 31 myń 326-ǵa artqan. Odan bólek, búgingi jaǵdaıda oblys turǵyndary úshin suıytylǵan munaı gazyna degen qajettilik 9-10 myń tonnany quraǵan.
Bul týraly oblys ákimdiginiń energetıka jáne turǵyn úı-kommýnaldyq sharýashylyq basqaramasynyń basshysy Ǵalym Isaqov habarlady.
Basqarma basshysynyń sózine súıensek, Energetıka mınıstrligi tarapynan toqsan saıyn áleýmettik suıytylǵan munaı gazy bólinip otyrady. Al bıyl qyrkúıek aıyna oblysqa 5 myń 330 tonna suıytylǵan munaı gazy bólinse, onyń ishinde «Petro Qazaqstan Oıl Prodakts» jaýapkershiligi shekteýli seriktestigi zaýytynan 3 myń 755 tonna, «SNPS-Aqtóbemunaıgaz» aksıonerlik qoǵamynan 1 myń 575 tonna jiberilgen.
Osy jyly aımaqqa 75 myń 661 tonna gaz bólinip, kásipkerler tarapynan, ıaǵnı 31 gaz jelisi uıymymen kommersııalyq suıytylǵan munaı gazy satyp alynýda.
– Qazirgi tańda oblysta 39 vagon-sısternada 1 myń 404 tonna suıytylǵan munaı gazy temirjolmen jóneltildi. Bul vagondar jaqyn ýaqytta dittegen jerge jetip, janarjaǵarmaı quıý stansııalaryna tolyqqandy bólinedi. Búginde óńirde 360 tonna suıytylǵan munaı gazynyń qory bar. Odan bólek, Energetıka mınıstriniń buıryǵyna sáıkes birinshi tamyzdan bastap Taraz qalasy jáne oǵan jaqyn aýdandardaǵy avtogaz toltyrý beketterinde gazdyń baǵasy bir lıtr úshin 102 teńge, alshaq ornalasqan, ıaǵnı 200 shaqyrymnan asatyn beketterde 107 teńgeni qurady, – deıdi Ǵalym Isabaıuly.
Sonymen birge basqarma basshysy qazirgi ýaqytta oblystaǵy barlyq avtogaz quıý beketterinde gaz erkin satylymda ekenin, tapshylyq jáne kezek kútýdiń baıqalmaıtynyn jetkizdi.
Jambyl oblysy
