Bıylǵy shara erekshe formatta uıymdastyrylyp, eki aıtýly dataǵa arnaldy – Respýblıka kúnine 35 jyl jáne Uly Jeńistiń 80 jyldyǵy. О́tetin oryn da sımvoldyq mánge ıe: Panfılovshylar saıabaǵy – tarıh pen taǵzymǵa toly qasıetti meken, urpaqtar sabaqtastyǵyn sezindiretin, otansúıgishtik rýhyn darytatyn oryn.
Saltanatqa ishki ister organdarynyń ardagerleri, qurmetti qonaqtar, IIM basshylyǵy, kýrsanttardyń ata-analary jáne Gonkong polısııa akademııasynan arnaıy delegasııa qatysty.
«Búgin bizdiń jas kýrsanttar ómirindegi eń alǵashqy ári mańyzdy qadamdy jasap otyr – olar Ant qabyldady. Halyqqa adal qyzmet etýge, zańdy qasterleýge jáne ofıser abyroıyn saqtaýǵa sert berdi. Bul oqıǵanyń dál osy jyly, osy jerde ótýi biz úshin asa mańyzdy. Respýblıka kúni men Jeńis mereıtoıy táýelsizdiktiń baǵasyn, Otanǵa qyzmet etýdiń úlken jaýapkershilik ekenin eske salady», dep atap ótti Qazaqstan Respýblıkasy IIM Maqan Esbolatov atyndaǵy Almaty akademııasynyń bastyǵy, polısııa polkovnıgi Qalıjan Qoblandın.
Ata-analar úshin de bul kún erekshe tolqynys pen maqtanyshqa toly sát boldy.
«Bul kúndi biz kóp kúttik. Biz úshin bul balalarymyzdyń eseıip, mańyzdy sheshim qabyldaǵanynyń aıǵaǵy. Endi olar elge qyzmet etýge daıyn. Búgin olardy jınaqy, symbatty, ózine senimdi kórip, júregimizdi maqtanysh sezimi kerneıdi», dedi ata-analardyń biri.
Jas kýrsanttar bul kúnge uzaq daıyndaldy. Búgin olar sap túzep, paradtyq kıimde, jınaqy da tártipti bolyp, Akademııa qataryn tolyqtyryp, ofıserlik jolǵa alǵashqy qadam basty.
