Ulttyq akademııalyq kitaphanada ótken dástúrli festıvalǵa bir top zııaly qaýym, shetel elshilikteriniń ókilderi, baspagerler, sýretshiler, qolóner sheberleri, ıllıýstratorlar, kitaphanashylar men oqyrmandar qatysty.
Keıingi jyldary kópshilik kitap oqýǵa bet bura bastaǵany baıqalady. Memleket basshysy Ulttyq quryltaı otyrystarynda eldiń bolashaǵy úshin kitap oqý men baspa isiniń mańyzdylyǵyna erekshe toqtalyp, kitap oqıtyn eldiń ǵana órkenıetti, zııaly ultqa aınalatynyn jıi aıtady. Qazir elimizde halyqaralyq, respýblıkalyq kitap festıvaldary men kórmeleri jıi ótkiziledi. Kitap oqýdy nasıhattaý maqsatynda uıymdastyrylǵan bul is-shara jastardyń rýhanı jáne ıntellektýaldyq damýyn qoldaýǵa, sondaı-aq ulttyq mádenı qundylyqtardy dáripteýge arnaldy.
Astanadaǵy dástúrli «KitapTime – 2025» IV respýblıkalyq kitap festıvaliniń ashylý saltanatynda sóz alǵan Ulttyq akademııalyq kitaphana dırektory Kúmis Qarsaqbaıqyzy:
«Kitap oqýdy nasıhattaýdy, oqyrmandardy kitaphanaǵa tartýdy, avtor men oqyrmandardy baılanystyrýdy maqsat etetin «KitapTime – 2025» respýblıkalyq kitap festıvali elimizdiń barlyq kópshilik kitaphanalarynda bir mezette ótedi. Festıval aıasynda kitap kórmelerimen, kitap baspalary – «Folıant», «Otbasy hrestomatııasy» jáne kitap dúkenderi «Kitapal», «Abaı úıi», «Paıdaly kitap», «Eldorado», shetelder elshiliginiń kitaptar kórmeleri jáne 20-dan astam qolóner sheberi ónimderiniń jármeńkesimen tanysa alasyzdar», dedi ol.
Is-sharada bard aqyn Tabyldy Dosymovtyń shyǵarmalary nasıhattalyp, aqyn ómirin qamtyǵan arnaıy kórme qoıyldy. Tabyldy shyǵarmashylyǵynan ánder shyrqalyp, estelikter aıtyldy. Elimizge belgili ónerpazdar qatysqan keshte aqyn ómiriniń keıbir tustary, shyǵarmashylyqtaǵy alǵashqy qadamdary sóz boldy.
Kórermen kózaıymyna aınalǵan taǵy bir tolqyndy shara – «Kúzgi jyr» poezııalyq dýmany. Poezııalyq keshte arnaıy qonaqtar men jas aqyndar óleń oqyp, jańashyl jyrlarymen kózge tústi. О́leńdi mánerlep oqıtyn ónerpazdar men ánshiler qatysyp, keshtiń kórigin qyzdyrdy.
Festıval aıasynda elimizdegi jáne sheteldik baspalar men kitap dúkenderiniń qatysýymen aýqymdy kitap jármeńkesi uıymdastyryldy. Qolóner jármeńkesi men arnaıy taqyryptyq kórmeler ótti. Jármeńkege ártúrli tanymal baspalardyń kitaptarymen qatar, TMD elderi klassıkteriniń shyǵarmalary qoıylǵan áýesqoı baspalar da qatysqan. Solaısha, oqyrman qaýym izdegenin taýyp, qalaǵan shyǵarmasyn satyp alýǵa múmkindik týdy.
Baǵdarlama barysynda «Abaı aýyly» etnolokasııasy men aqyn murasyna arnalǵan kórme, «Aýylǵa kitap syılaý» aksııasy, elshilikterdiń «Ulttyq atrıbýttar» kitap-ıllıýstrasııalyq kórmesi, «BookCrossing», «Bıblıorıng» ádebı oıyndary, velosherý, sýret kórmesi, sheberlik saǵattary, «Picnic time» fotoaımaǵy jáne basqa da is-sharalar ótti. Munyń bári halyqty kitap oqý mádenıetine burýdyń birden-bir joly. Máselen, elimizde sáýir aıynda Ulttyq kitap kúni atalyp ótiledi. О́zge damyǵan memleketter ondaı betburysty erte kezden qolǵa alyp, jolǵa qoıǵanyn bilemiz. Mysaly, Ulybrıtanııada ata-analar kúnde balasymen birge keminde 25 mınýt kitap oqıdy eken. Tipti mektep jasyndaǵy balalardyń sabaqtan tys ýaqytta oqıtyn ádebıetteriniń tizimi jasalǵan. Bul tájirıbe Japonııada da bar. Balalardy kishkentaıynan kitapqa qyzyqtyrý úshin ata-analarǵa balanyń jas ereksheligine saı kitaptar úlestiriledi. Kitaphana qyzmetkerleriniń nusqaýymen ata-analar balasymen birge kúnde kitap oqıdy. Aı saıyn úıine jaqyn jerdegi kitaphanaǵa kitaptardy ótkizip, qajet kitaptaryn alyp ketedi. Japonııadaǵy Halyqaralyq balalar ádebıeti kitaphanasynda balalarǵa arnalǵan úzdik ádebıetterdiń sıfrlyq qory jasaqtalǵan. Eldiń túkpir-túkpirindegi ata-analar balalaryna vırtýaldy kitaphanadan qajet kitaptaryn oqyp bere alady. Al Fınlıandııada jańa týǵan sábıge arnaýly qorapsha syıǵa tartylady. Onyń ishinde 1 jasqa deıingi balaǵa arnalǵan kitaptar toptamasy bolady. Ata-ana jańa týǵan sábıge ıllıýstrasııalyq kitaptardy daýystap oqý arqyly balany erte jastan kitapqa baýlıdy. Sonymen qatar aýyl-aýyldardy aralap júretin arnaýly kitaphana-avtobýstar bolady (Book bus).
«KitapTime – 2025» festıvali bir mezette respýblıka boıynsha barlyq óńirlik kitaphanada uıymdastyrylyp, túrli formatta mazmundy is-sharalar qarastyrylǵan. Bıylǵy aıtýly festıval aıasynda 1089 is-shara ótkizilip, 30 myńǵa jýyq oqyrman qamtylǵan.
