Qazaq halqy úshin qazaq tiliniń orny aıryqsha. Ol – ata-babamyzdan qalǵan asyl mura, urpaqtan urpaqqa jetken qazyna. Qazaq tili ǵasyrlar boıy nebir tarıhı kezeńderdi bastan keshirip, talaı synaqtan súrinbeı ótti. Búginde ol –Qazaqstan Respýblıkasynyń memlekettik tili, elimizdiń tutastyǵy men táýelsizdiginiń basty belgisi.
Degenmen, qazirgi qoǵamda ana tilin saqtaý máselesi ózekti bolyp qala beredi. Jahandaný dáýirinde kóptegen ulttardyń tili umytylyp, joǵalyp bara jatyr. Eger biz óz tilimizdi qadirlemesek, ony kúndelikti ómirde qoldanbasaq, keleshek urpaq ana tilinen ajyrap qalýy múmkin.
Tildi saqtaý –tek memleket saıasatynyń ǵana emes, árbir azamattyń boryshy. Urpaq boıyna tildiń qadirin sińirý úshin eń aldymen otbasy men mektepten bastaý kerek. Balanyń eń alǵash estıtini de, sóıleıtini de – ana tili. Sondyqtan ata-ananyń da, ustazdardyń da mindeti –balalarǵa ana tilin úıretý, oǵan degen súıispenshilikti oıatý. Qazaq tilin damytý - ulttyń rýhanı táýelsizdigin nyǵaıtý. Ana tilin ardaqtaý arqyly biz tarıhymyzdy, mádenıetimizdi, dástúrimizdi saqtaımyz.
Memleket basshysynyń «Memlekettik tildi meńgerý –árbir otandasymyzdyń paryzy» degen sózi árqaısymyzdyń júregimizde turýy tıis. Qorytyndylaı kele, tildiń taǵdyry bizdiń qolymyzda. О́z ana tilimizdi qurmettep, kúndelikti ómirde qoldaný arqyly biz ultymyzdyń bolashaǵyn jarqyn etemiz. Tilin súıgen halyq eshqashan joıylmaıdy.
Aınagúl MÁJITOVA,
Batys Qazaqstan oblysynyń mamandandyrylǵan aýdanaralyq ekonomıkalyq sotynyń bas mamany.
