30 qyrkúıek kúni Almatyda Chempıondar lıgasynyń ekinshi týryndaǵy match ótti. Onda «Qaırat» óz alańynda madrıdtik «Realdy» qabyldady. Ispandyq komandanyń bas bapkeri Habı Alonso negizgi quramdy alańǵa shyǵardy, onyń qatarynda Kılıan Mbappe de boldy. Fransýz shabýylshysy het-trık jasap, Chempıondar lıgasyndaǵy goldar sanyn 60-qa jetkizdi. Keıin ol alańnan almastyryldy. Kezdesý nátıjesi – Eýropanyń eń ataqty klýbynyń paıdasyna 5:0.
Oıynnan keıin Mbappe óz áserimen bólisip, «Qaırattyń» oıyny men stadıondaǵy atmosferany erekshe atap ótti.
– «Qaırat» – sapaly komanda. Chempıondar lıgasynda osyndaı klýbtardyń bolýy jaqsy dep oılaımyn. Bul týrnırdiń kez kelgen belgili bir deńgeıge jetken komandalarǵa ashyq ekenin kórsetedi. Jankúıerlerdiń qoldaýy keremet boldy. Bul men úshin tamasha tájirıbe boldy, – dedi ol.
Fransýz shabýylshysy jeke statıstıkadan góri komanda jetistiginiń mańyzdy ekenin atap ótti.
– Chempıondar lıgasyndaǵy 60 gol – bul mańyzdy kórsetkish. Biraq alda áli kóptegen oıyn bar. Maǵan kóbirek gol soǵyp, komandalyq mindetterdi sheshýge kómektesý qajet, – dedi Mbappe.
Aıta keteıik, Almatyda jasaǵan het-trıginiń arqasynda Mbappe bıylǵy maýsymdaǵy Chempıondar lıgasynyń bombardırler jarysynda kósh bastap tur. Ol osyǵan deıin tórt goly bar mıýnhendik «Bavarııanyń» shabýylshysy Harrı Keındi artta qaldyrdy.
