Baldyrǵandarǵa arnap kórkem dúnıe jazý qıyn. Aldymen olardyń jan dúnıesin tereń túsiný kerek. Buǵan asqan sheberlik qana emes, balaǵa tán tazalyq, meıirimdilik qajet. Bir jaǵynan, búgingi ýaqyt basqa. Jetkinshekterdiń ádebı talǵamy da ózgeshe. Jas oqyrmandy baıaǵydaı aýyl kórinisterimen aldaı almaısyń. Qazir – jańa tehnologııa dáýiri. Robottehnıka zamany. Sondyqtan búginde balalar taqyrybyna qalam tartyp júrgenderge artylǵan júk jeńil emes.
Alaıda avtor osy maqsatty jaqsy sezingen. Jańa jınaqqa jazýshynyń keıingi jyldary jazylǵan áńgime-hıkaıattary, ertegileri toptastyrylǵan. Munda qala men aýyl balalarynyń psıhologııasy dál kórkemdelgen. Keıipkerleriniń bolmysy da, ómirge kózqarasy da basqasha. Qalamger olardyń minez-qulqyn shynaıy beıneleıdi. Ulttyq tárbıe qundylyqtary týraly da astarlap aıtady.
Mysaly, «Baǵyń jansyn, balam!» degen áńgimesinde qalaǵa jaqynda qonys aýdarǵan Ábýtalap qarttyń basynan ótken oqıǵa baıandalǵan. Bular turatyn ekinshi qabattaǵy qarama-qarsy esiktegi kishkentaı bala kúnde esik aldynda otyrǵan aqsaqaldyń qasynan úndemeı óte shyǵady. Biraq ózi pysyq. Bir kúni qasynan asyǵa ótip bara jatqan álgi balany qart toqtatady. Endi osy dıalogke zer salyńyz:
« – Áı, balam kishkene aıaldashy!
Kishkentaı ul kidirdi.
– Atyń kim?
– Ashat.
– Qaı synypta oqısyń?
– Tórtinshide.
– Sabaǵyń qalaı?
– Jaqsy.
– Bestik baǵalaryń kóp pe?
– Iá, ata! Bir sabaqtan tórtim bar...
– Áke-shesheń úlken kisimen amandas dep aıtpaı ma?
– Aıtady.
– Endeshe, nege amandaspaısyń?».
Osy qysqasha úzindiden biraz nárseni ańǵarasyz. Bunda úlkenge sálem berýdi umytqan balany ǵana emes, ulttyq tamyrdan ajyrap bara jatqan búgingi urpaq beınesin kóresiz. Avtor ony aıqaılap emes, emeýrinmen jetkizedi. Jalpy, kitapta kóńildi selt etkizer osyndaı oıly dúnıe kóp. Jınaqqa jazýshynyń kólemdi úsh povesi engen. Ondaǵy kishkentaı keıipkerler beınesi arqyly qoǵamdaǵy keleńsiz oqıǵalar kórinis tapqan. Al ertegilerdiń mazmuny bólek. Bári de ómirden oıyp alynǵan.
Tolymbek Ábdiraıym – búgingi balalar ádebıetiniń beldi ókiliniń biri. Buǵan deıin birneshe prozalyq eńbegi jaryq kórgen. Kórnekti jazýshy, Memlekettik syılyqtyń laýreaty Ákim Tarazı kózi tirisinde: «Men Tolymbektiń shyǵarmashylyǵyn arnaly ózenge teńer edim. Onyń aıtary alda dep oılaımyn...», dep baǵa beripti.
