Jarysta erler men áıelder arasyndaǵy jekeleı saıys pen muzdaǵy bıden medaldar jıyntyǵy sarapqa salynady. Sheteldik birqatar beldi sportshy óner kórsetedi. Elimizdiń namysyn qorǵaıtyn mánerlep syrǵanaýshylar arasyndaǵy eń ataqtysy Mıhaıl Shaıdorov. 21 jastaǵy almatylyq saıypqyran bıyl úsh birdeı baıraqty básekede jeńis tuǵyrynan kórindi. «Tórt qurlyq birinshiliginde» altyn, álem chempıonatynda kúmis, Azııa oıyndarynda qola medal oljalady. Erler jarysynda Shaıdorovtan bólek, Dıas Jırenbaev, Nıkıta Krıvosheev, Oleg Melnıkov baq synaıdy.
Áıelder arasyndaǵy eń úzdik sportshymyz Sofııa Samodelkına jaraqatyna baılanysty Denıs Ten memorıalyna qatysa almaıtyn boldy. Onyń ornyn Sofııa Farafonova, Ámıra Irmatova, Veronıka Kovalenko, Nurııa Súleımen, Ámına Alekseeva, Karına Ysqaqova, Rýsalına Shákirova syndy arýlar basty. Muzdaǵy bıde talaı dúbirli dúrmekte ysylǵan Boısangýr Datıev pen Gaýhar Naýryzova juby ónerlerin ortaǵa salady.
