Prezıdenttiń aıtýynsha, otyz jyldan astam ýaqyt buryn Qazaqstan beıbitshilik pen qaýipsizdik jolyn tańdap, ıadrolyq qarýdan óz erkimen bas tartty. Búginde elimiz jasandy ıntellekt beıbit maqsatta ǵana qoldanylýǵa tıis dep batyl túrde málimdeıdi. Onyń áskerı salada, kıbershabýyldarǵa jáne halyqaralyq turaqtylyqqa qater tóndiretin jobalarda paıdalanylýyna jol berýge bolmaıdy.
«BUU Bas Assambleıasynyń taıaýda ótken sessııasynda men Qazaqstannyń Uıym aıasynda Jasandy ıntellektini basqarý jónindegi jahandyq dıalog jumysyna atsalysýǵa daıyn ekenin rastadym. Biz seriktesterimizdiń bastamalaryn, sonyń ishinde Qytaıdyń JI salasyndaǵy jahandyq yntymaqtastyq uıymyn qurý týraly usynysyn qoldaımyz.
Men bıyl halyqqa Joldaýymdy sıfrlandyrý jáne jasandy ıntellekt máselesine arnadym. Biz aldymyzǵa naqty maqsat qoıdyq: Qazaqstan úsh jyl ishinde naǵyz sıfrlyq el bolýy kerek. Bul – óte aýqymdy mindet. Sondyqtan biz qazir elimizdiń birtutas sıfrlyq ekojúıesin qurý isimen belsendi túrde aınalysyp jatyrmyz», dedi Prezıdent.
Qasym-Jomart Toqaev jasandy ıntellekt tehnologııasyn jaýapkershilikpen qoldaný óte mańyzdy ekenin atap ótti.
«Keshe Astanada Jasandy ıntellektini damytý jónindegi keńestiń birinshi otyrysy ótti. Jıynda bilim berý máseleleri qaraldy. Álemge tanymal sarapshylarmen birge adam kapıtalyn damytý máselesi talqylandy, naqty mindetter aıqyndaldy. Eń bastysy, jasandy ıntellekt salasyndaǵy tuńǵysh zertteý ýnıversıtetin qurý týraly óte mańyzdy sheshim qabyldandy», dedi Memleket basshysy.
Sondaı-aq Prezıdent búgin «Alem.ai» halyqaralyq jasandy ıntellekt ortalyǵy óz jumysyn bastaǵanyn aıtty. Bul ortalyqty ınnovasııalar men tyń ıdeıalardyń mekeni deýge bolady. Jalpy, Qazaqstan osy saladaǵy kez kelgen yntymaqtastyqqa ashyq.
«Sondaı-aq biz elimizde ekinshi sýperkompıýter klasterin iske qosýdy josparlap otyrmyz. Jasandy ıntellekt tek ıgi maqsatqa qyzmet etýi kerek. Adam ıgiligi basty orynda turady. «Alem.ai» jasandy ıntellektini barynsha tıimdi ári etıkalyq normalarǵa saı qoldanatyn jahandyq ortalyq bolýǵa tıis. Jasandy ıntellekt tehnologııasyn jaýapkershilikpen qoldaný óte mańyzdy. Sondyqtan jańa ýnıversıtet jáne «Alem.ai» ortalyǵy birtutas ekojúıeniń negizgi ózegi retinde qyzmet etýi kerek», dedi Qasym-Jomart Toqaev.
