Forým memlekettik basqarýǵa jasandy ıntellektini engizýdiń ashatyn múmkindikteri men týyndatatyn syn-qaterlerin talqylaýdyń negizgi alańyna aınaldy. Sonymen qatar Qazaqstannyń jahandyq sıfrlyq transformasııadaǵy strategııalyq róli erekshe ataldy.
Sinovation Ventures jáne 01.ai kompanııasynyń bas dırektory Kaı-Fý Lı Qazaqstannyń jańa býyn tehnologııalaryn engizýge daıyn ekenin atap ótti. Ol ulttyq jasandy ıntellekt strategııasynyń mańyzyn kórsetip, eldiń batyl maqsat qoıý qabileti sıfrlyq dáýirdegi kóshbasshylyqtyń kepili bolatynyn aıtty.
«AI-agentterdiń kúshi – sýpersıfrlyq qyzmetkerlerdiń paıda bolýynda. Olar chat-bottar sııaqty suraqtarǵa jaýap berip qana qoımaıdy, buryn sheshilmegen máselelerdi de sheshe alady. Árıne, qaýipsizdik máseleleri bar. Biraq Qazaqstannyń osy syn-qaterdi qabyldap, jedel qarqynmen alǵa jyljýǵa daıyn ekenin kórip qýanyshtymyn», – dedi Kaı-Fý Lı.
Onyń aıtýynsha, ulttyq strategııada naqty ólshenetin maqsattardyń bolýy mańyzdy.
«Bul maqsattar batyl, biraq ólshemdi bolýy kerek», – dep qosty ol.
Khalifa University professory, 6G Research Center negizin qalaýshy, TII bas ǵylymı qyzmetkeri Merýan Debba Qazaqstannyń JI qoldaný arqyly ónimdilikti arttyrýda jáne ınnovasııalardy damytýda erekshe múmkindikterge ıe ekenin atap ótti.
«Sılıkon ańǵaryna qarasaq, eń tabysty startaptar – alyp kompanııalar emes, shaǵyn toptar. Olar jańa quraldardy tıimdi paıdalana biledi. Bul Qazaqstan sııaqty elderge mıllıardtaǵan halqy bar memlekettermen teń dárejede turýǵa jol ashady. О́ıtkeni qazir sizderde osy quraldardy qoldanyp, anaǵurlym tıimdi bolýǵa múmkindik bar», – dedi ol.
ITU keńesshisi, BUU-nyń AI for Good bastamasynyń jetekshisi Ebtesam ál-Mazrýı Qazaqstan Prezıdenti men Úkimetiniń jasandy ıntellekt salasynda berik negiz qalaǵanyn atap ótti.
«Sizderdiń Prezıdentterińiz jáne Premer-Mınıstrdiń orynbasary – Jasandy ıntellekt mınıstri tildik iri modelder boıynsha úlken jumys atqardy. Erteń sizder bul tehnologııany ózderińiz synap kóresizder. Mınıstr aıtqandaı, Qazaqstan azamattary ony birge jasap, damytýǵa qatysady. Osy arqyly qazaqstandyq qoǵamǵa sáıkes etıkalyq normalardy qalyptastyrý múmkindigi paıda bolady», – dedi ol.
Ál-Mazrýı Qazaqstannyń qysqa ýaqyt ishinde JI ekojúıesin qura alǵanyn erekshe atady. Onyń ishinde H2 100 esepteý klasterin iske qosý, Prezıdent janyndaǵy jasandy ıntellekt jónindegi alǵashqy keńes, ulttyq AI-platforma jáne JI týraly zań jobasy bar. Sonymen birge adamı kapıtaldy damytýǵa erekshe kóńil bólinýde.
BUU Damý baǵdarlamasynyń Qazaqstandaǵy turaqty ókili Katarjına Vavernıa eldiń jahandyq JI kún tártibine senimdi kirgenin málimdedi. Onyń aıtýynsha, Qazaqstanda bilim, densaýlyq saqtaý jáne memlekettik basqarý salalarynda JI qoǵamǵa paıda ákelýi úshin jaqsy alǵysharttar bar. Biraq ol bul ózgeristerden eshkim shet qalmaýy tıis ekenin eske saldy.
«Qazaqstan jaqsy pozısııada tur jáne osy kún tártibine endi. Biraq biz birlese otyryp, eshkimniń shet qalmaýyn qamtamasyz etýimiz kerek», – dedi ol.
Stanford Graduate School of Education-niń burynǵy tehnıkalyq dırektory ári dekanynyń orynbasary Pol Kım Qazaqstannyń bilim berý bastamalary tarıhı kezeńde turǵanyn aıtty. Onyń pikirinshe, AI SANA jobasy bilim berý júıesin túbegeıli ózgertip, stýdentterdi tek bilim alýshy ǵana emes, jańa tehnologııalardy jasaýshy jáne zertteýshi retinde qalyptastyrady.
«Men Qazaqstan dál qazir sheshýshi sátti bastan keship otyr dep senemin. AI SANA jobasy qazirgi de, bolashaqta da zor yqpal etedi. Ol stýdentterdi gıperózin-ózi retteý qabiletin damytýǵa, jasaýshy ári zertteýshi bolýǵa úıretedi», – dedi Pol Kım.
Osylaısha Astana Open Dialogue III otyrysy halyqaralyq sarapshylardyń Qazaqstandaǵy sıfrlandyrý baǵytyn joǵary baǵalaýymen aıaqtaldy. Eldiń jasandy ıntellektini damytýǵa degen umtylysy álemdik úrdisterge sáıkes keletini jáne jańa tehnologııalyq serpilisterge jol ashatyny atap ótildi.
