Qazaq zaǵıptar qoǵamynyń múshesi, otyz jyldan astam qoǵamnyń oqý-óndiristik kásipornynda eseli eńbek etken Dildásh Amenova burynǵy Kókshetaý oblysy Krasnoarmees aýdanyna qarasty shoq juldyzdaı shaǵyn ǵana Kózashar aýylynda kópbalaly otbasynda dúnıege kelgen. Ákesi Qabdósh Naýryzbaıuly – Ekinshi dúnıejúzilik soǵys ardageri. Soǵys aıaqtalǵannan keıin aýyl sharýashylyǵyn qalpyna keltirý baǵytynda qısapsyz eńbek etken. Keıingi urpaǵyn da adal eńbekke baýlyǵan. О́ziniń eńbekqorlyǵymen ónege bolǵan. Anasy da baýyr eti balalaryn tárbıeleýmen birge satýshy bolyp jumys istegen. Otbasyndaǵy jeti balanyń kenjesi – Dildásh Qabdóshqyzy.
Mektepte oqyp júrgen kezinde qatar qurbynyń aldy boldy. Oqý ozaty. Aýyldaǵy segizjyldyq mektepti aıaqtaǵan soń oblys ortalyǵyndaǵy saýda tehnıkýmyna oqýǵa túsedi. Bolashaq taýartanýshy. Taǵdyrdyń joly buralań. Bári biz oılaǵandaı bola bermeıdi. 1984 jyly qapelimde jol apatyna ushyraǵan.
– Qos janarym eshteńe kórmeı qaldy, – deıdi Dildásh Qabdóshqyzy, – balamyn ǵoı, tym qatty qoryqqan da joq shyǵarmyn. Jol apaty kezinde kózime qan quıylypty, sonyń áseri. Bir jaqsysy, ol kezde qara ormandaı qalyń eldiń qaımaǵy buzylmaı turǵan ýaqyty. Keshegi synyptastarym kún saıyn kelip, kóńilimdi aýlaıdy, áńgime-dúken quramyz. Sol sátte birinshi toptaǵy múgedek ekenimdi de umytyp ketemin. Meniń jaryq dúnıeden aq sáýle izdegen janarym janymdaǵy janashyr qurbylarym tárizdi.
Eńbek jolyn 1988 jyly Kókshetaý qalasyndaǵy qazaq zaǵıptar qoǵamynyń múshesi bolǵannan keıin bastady. Oqý-óndiristik kásipornynyń qýyrshaq arba sehyna jumysshy retinde qabyldandy. Kásiporyn sehtarynda matras, jastyq tigiletin, karton sehynda qoraptar jınalatyn. Áıteýir jumys qaınap jatty. Tańerteńnen keshke deıin bas kótermeı eńbek etetin. Sóıte júrip ózi sekildi zaǵıp jandarmen birge konserttik baǵdarlamalar qarap, kóńil kóteretin. 2005 jyly turmysqa shyqty. О́mirge uly keldi. Ol qazir Qazaq-Brıtan ýnıversıtetiniń stýdenti. О́miriniń jalǵasy, kóziniń qarasy.
Elgezek jan elimizdiń jeńil ónerkásibin damytýǵa qosqan úlesi úshin san márte alǵyshattarmen marapattaldy. Taǵdyrdyń salǵan isine tótep bere júrip, kóńili qalaǵan ónerin de esh umytqan emes. Qoly qalt etkende ádemi daýsymen tamyljytyp án shyrqaıdy. Janyna jiger beretin de osy óner. Janary kórmegenmen, qyzyldy-jasyldy boıaýy kóp ǵumyr atty álemdi jan júregimen sezinedi. 2024 jylǵy qarashada zaǵıptar qoǵamynyń músheleri arasynda ótken respýblıkalyq «Abaı álemi» baıqaýyna qatysyp, oblys namysyn qorǵady.
Tirshilikte pendeniń aıaǵyna tusaý salǵysy kelgen taǵdyrdyń tar qamytyn adam boıyndaǵy adaldyq pen ómirge degen qushtarlyq jeńedi eken. Dildásh Qabdóshqyzynyń ómir týraly ónegesine qanyǵa otyryp biz osyny uǵyndyq.
KО́KShETAÝ
