Ol «Jylyoıgaz» JShS-da eńbekti qorǵaý jáne qaýipsizdik tehnıkasy jónindegi ınjener bolyp qyzmet etedi. Mindeti – óndiristegi qaýipsizdiktiń saqtalýyn qadaǵalaý. Joǵary bilimdi Jáńgir han atyndaǵy Batys Qazaqstan agrarlyq-tehnıkalyq ýnıversıtetinen alǵan. Keıin tehnıka jáne tehnologııa salasynyń magıstri atandy.
Ýnıversıtettegi oqýyn aıaqtaǵannan keıin úlken eńbek jolyn osy seriktestikte bastady. Jas maman birden tabandylyǵymen, jumysty jaýapkershilikpen atqaratyn iskerligimen erekshelendi. Aýdandaǵy eldi mekenderdi «kógildir otynmen» qamtıtyn seriktestik basshylary jas mamanǵa senim artyp, eńbekti qorǵaý jáne qaýipsizdik tehnıkasy jónindegi ınjener mindetin júktedi.
«Maǵan júktelgen mindet tabıǵı gazdy tasymaldaýmen baılanysty bolǵandyqtan, jumysymdy qaýipsizdik tehnıkasyn tekserýden bastaımyn. Jabdyqtardy muqııat tekserip, jumys oryndarynyń jaı-kúıin baǵalaımyz. Sebebi apattyń saldaryn joıýdan góri onyń aldyn alý áldeqaıda jeńil. Basty qaǵıdat – apatty boldyrmaý», deıdi A.Amanjolov.
Jas ınjenerdiń aıtýynsha, atqaratyn jumysy san alýan. Birinshiden, gaz qubyrynda apattyq jaǵdaılardy boldyrmaý jónindegi is-sharalardy júrgizedi. Ekinshiden, jeke qorǵaný quraldarynyń jaramdylyǵy men qoldanýdy baqylaıdy. Úshinshiden, seriktestik qyzmetkerlerin oqytýdy uıymdastyrady. Tórtinshiden, bes jyl saıyn bir ret mamandardy attestattaýdan ótkizedi.
«Ujym – meniń ekinshi úıim. Jumys istegenime sonshalyqty kóp ýaqyt ótpese de muny jaqsy túsindim. О́ıtkeni tolymdy tájirıbesin bólisýden tartynbaıtyn tálimgerlermen kózqarasymyz ortaq, maqsatymyz bir», deıdi A.Amanjolov.
Ol ujymdaǵy túrli is-sharany uıymdastyrýshylardyń bel ortasynda júredi. Merekelik keshterdi júrgizedi. Qoǵamdyq jumystan bas tartpaıdy. Sporttyq jarystarǵa qatysady. Apta saıyn «Taza Qazaqstan» aksııasy aıasynda ótetin senbilikte qorshaǵan ortanyń tazalyǵyn saqtaýǵa atsalysady.
«Bala kúnnen bergi hobbıim – atpen serýendeý. Bul rýhyńdy oıatady, shydamdylyqqa jeteleıdi. Alty jasymnan jylqyǵa qalaı kútim jasaýdy úırendim. Jumystan qolym bosaǵan kezde ákem, aǵalarymmen birge serýendeımiz. Atqa mingende qanat bitkendeı kórinedi», deıdi jas ınjener.
Onyń kúndelikti qaǵıdasy – úırený, úıretý, alańsyz, qaýipsiz ómir súrý. Bul ásirese jastardyń jadyna myqtap túıetin ustanym bolýy kerek. Jaqynda A.Amanjolov «Eńbek joly» respýblıkalyq baıqaýynyń oblystyq kezeńinde «О́ndiristegi úzdik jas maman» atalymynda jeńimpaz atandy. Muny óziniń ǵana emes, ujymnyń jeńisi dep biledi.
Atyraý oblysy
