Jańa júıege kóshý kezeń-kezeńimen júzege asyp, 2026 jylǵy 10 sáýirge deıin tolyq aıaqtalmaq.
EES tek 180 kún (jarty jyl) ishinde 90 kúnge deıingi merzimge qysqa sapar jasaıtyn Eýroodaqqa múshe emes elderdiń azamattaryna ǵana arnalǵan. Al Islandııa, Lıhtenshteın, Norvegııa jáne Shveısarııa azamattary Entry/Exit System tekserisinen bosatylady.
Júıe Shengen aımaǵyna qysqa merzimdi vızamen nemese vızasyz kiretinderdiń barlyǵyn qamtıdy. Árbir shekaradan ótý nemese elge kire almaý jaǵdaılary elektrondy túrde tirkeledi.
Eýrokomıssııanyń málimetinshe, EES shekaralyq baqylaýdy jedeldetip, tıimdiligin arttyrý úshin engizilip otyr. Budan bylaı pasporttardy qolmen tekserý ornyna sıfrlyq tirkeý júrgiziledi. Jolaýshylar tıisti termınaldarda tekseristen ózderi óte alady. Bul rette quqyq qorǵaý organdary izdeýde júrgen nemese kúdikti adamdardy tabýǵa kóbirek kóńil bóle alady.
Tolyqqandy jumys isteý úshin jańa júıede kelesi úlken derekter (Big data) jınalady jáne saqtalady:
- Jol qujattarynda qamtylǵan barlyq málimetter, sonyń ishinde sheteldiktiń aty-jóni, týǵan kúni, azamattyǵy, banktegi salymdary jáne basqasy,
- Shengen aımaǵyndaǵy qaı elden shyqqany, taǵy qaı elge kiretini, kúni men orny,
- Bıometrııalyq málimetteri (ázirge – saýsaq tańbasy men fotosýreti),
- Kirýge ruqsat etýden bas tartylǵany týraly maǵlumattar bolady.
Eger saıahatshy buǵan deıin shengen vızasyn alǵan bolsa, onyń saýsaq izderi EO-nyń vızalyq júıesinde (VIS) saqtalǵandyqtan, qaıta skanerleý talap etilmeıdi.
Derekter júıede ártúrli jaǵdaıǵa baılanysty 3 jyldan 5 jylǵa deıin saqtalady da, belgilengen merzim ótken soń avtomatty túrde joıylady. Keıin jańa sapar úshin derekterdi qaıta engizý qajet bolady.
SchengenVisaInfo-nyń dereginshe, 2024 jyly Qazaqstanda 179 446 shengen vızasyna ótinish túsken. Bul el tarıhyndaǵy eń joǵary kórsetkish ári 2023 jylǵy rekordtan 12,8% artyq. Osy kórsetkish Qazaqstandy shengen vızasyna ótinish berýshiler sany boıynsha álemde 16-orynǵa shyǵardy.
