Mereke bastaldy!

Naýryz keldi! Iá, Naýryz kelip, elde shat-shadyman shattyq ornady. Kún jylynyp, jer qaraıyp, kóńil shýaǵy kógildir kóktemdi kórikti ete tústi. Naǵyz qýanyshty meıram bastaldy. Bul izgilikti merekeden elimizdiń qorǵany – Qazaqstannyń áskerı qyzmetshileri de tys qalmady. О́ıtkeni, Naýryz meıramy – Shyǵysta jyldyń basy bolyp sanalatyn eń uly mereke. Ulystyń uly kúni árqashan aıryqsha qarsy alynady. Sondyqtan bizdiń halyq úshin Naýryz – dostyq, yntymaqtastyq, beıbitshilik pen tatýlyqtyń nyshanyna aınalǵan ulyq mereke retinde erekshe toılanady. Mine, endi osyǵan oraı el Qarýly Kúshteriniń áskerı qyzmetshileri kóktemniń basty shyraıly merekesin laıyqty ótkizý úshin daıyndyqqa kirisip ketti. Ol úshin kúni erteń barlyq áskerı bólimderde dástúrli túrde mádenı-oıyn-saýyq baǵdarlamalary uıymdastyrylady, saltanatty jasaýmen kıiz úıler turǵyzylyp, mol dastarqan jaıylyp, túrli sporttyq jarystar men ulttyq salt-dástúr taqyrybynda saıystar ótkiziledi. Al solardyń arasy­nan «Ońtústik» óńirlik áskerı qyz­metshileri Naýryz meıramyna alǵashqylardyń qatarynda daıyndyq jumystaryn júrgizip, jergilikti turǵyndarmen birlesip altybaqan, sándi aq kıiz úılerimen qazaqtyń naǵyz ulttyq aýylyn turǵyzdy. Ofıserler men sarbazdar qyz qýý, teńge alý, arqan tartý sııaqty ulttyq oıyndarǵa qatyssa, apa-ájelerimiz ultymyzdyń dástúrli Naýryz kójesin ázirledi. Bul kóktem merekesine Qazaqstandaǵy jalǵyz taý-qoryǵy rotasynyń áskerı qyzmetshileri qatysty. Olar áskerı tehnıka óte almaıtyn shıelenisti taýly jerlerde jeke quramdy tasymaldaýǵa arnalǵan attardyń ústinde shabandozdyq pen ádil-tásil elementterin kórsetti. Aleksandr TASBOLATOV, «Egemen Qazaqstan».