Kýágerlerdiń aıtýynsha, oqıǵa Petropavldaǵy № 2 avtobýsta bolǵan. Eki er adam shamamen 12 jastaǵy eki qyzǵa tıisip, beıádep sózder aıtqan, olarǵa jasóspirimderdiń syrtqy kelbeti unamaǵan. Jolaýshy boıjetken ara túskenimen, janjal ýshyǵa túsken.
— Qyz qatty qorqyp, jylady. Al avtobýstyń kondýktory oqıǵaǵa múldem aralasqan joq. Birden polısııa men jedel járdem qyzmetkerlerin shaqyrdyq, - deıdi avtobýsta bolǵan jolaýshy.
Tártip saqshylary kúdiktilerdi izin sýytpaı anyqtap, qyzǵa qol júmsaǵan er adamdy qamaýǵa aldy.
— Qala ishindegi avtobýsta kámeletke tolmaǵan qyzǵa qatysty quqyqqa qaıshy áreketter faktisi boıynsha polısııa dereý sharalar qabyldady. Kúdikti birden ustalyp, polısııa bólimshesine jetkizildi. Atalǵan fakti boıynsha qylmystyq is qozǵaldy. Sotqa deıingi tergeý amaldary júrgizilip jatyr. Balalarǵa qatysty mundaı áreketter zańdy óreskel buzý retinde baǵalanady jáne qatań jazalanady. Bul jaǵdaı tolyq polısııa baqylaýynda, — dep jaýap berdi Soltústik Qazaqstan oblystyq polısııa departamenti baspasóz qyzmetindegiler.
