Sportshy óz jazbasyn jeksenbi, 5 qazanda H (burynǵy Twitter) áleýmettik jelisinde jarııalady.
«Kún saıyn bar kúshimdi jattyǵýǵa jumsap jatyrmyn. Jaqynda oktagonǵa qaıta oralamyn, shydamym taýsylyp barady», – dep jazdy Rahmonov.
Buǵan deıin áleýmettik jeliler men BAQ-ta Rahmonov jaraqat alyp, UFC-degi mansabymen qosh aıtysady degen aqparat taraǵan bolatyn.
Aǵylshyntildi Twitter-de taraǵan habarlamalarda sportshynyń tizesinen jaraqat alyp, aldaǵy aılarda oktagonǵa qaıta orala almaıtyny aıtyldy. Al reseılik MMA qaýymdastyǵynda odan da daýly málimdeme jasalyp, Rahmonov AQSh promoýsheninde endi óner kórsetpeıdi degen aqparat tarady.
Alaıda biraz ýaqyt ótken soń Rahmonov jattyǵatyn Dar Team komandasynyń áleýmettik jelisinde sportshynyń jattyǵý ústindegi birneshe foto jáne vıdeo jarııalandy, onda ol jaraqat alǵan adamǵa uqsamaıdy.
Tengri Sport tilshisi Rahmonovtyń jattyqtyrýshysy Edýard Bazrovtan pikir aldy. Ol shákirtiniń qazirgi jaǵdaıy týraly naqty aqparat joq ekenin aıtty.
Al Vesti.kz saıtynyń saýalyna Rahmonovtyń menedjeri Saıat Abdrahmanov: «Bul aqparat shyndyqqa janaspaıdy», – dep málimdedi.
