Osyǵan deıin ortalyqqa 160-tan astam ótinish túsip, olardyń basym bóligine áleýmettik, quqyqtyq jáne psıhologııalyq qoldaý kórsetilipti. Ásirese kópbalaly jáne az qamtylǵan otbasylarǵa, áıelder men balalarǵa erekshe kóńil bólinip, qajetti jaǵdaıda ýaqytsha baspana berilip, ońaltý jumystary júrilip jatyr.
Semeı qalasyndaǵy Papanın kóshesi, 34A mekenjaıynda ornalasqan ortalyqqa arnaıy baryp, áleýmettik nysandy óz kózimizben kórip qaıtqan edik. Ortalyq zamanaýı talaptarǵa saı ınfraqurylymmen jabdyqtalypty. Munda qabyldaý bólimi, ana men bala bólimi, balalarǵa arnalǵan oıyn alańy, trenıng zaldary jáne mamandar qabyldaıtyn kabınetter bar eken. Ortalyqtyń qyzmeti – bilim, densaýlyq saqtaý, jumyspen qamtý bólimderimen, polısııamen, úkimettik emes uıymdarmen jáne áıelder birlestikterimen áriptestik negizinde jumys isteıdi.
– Ortalyqqa júgingen azamattardyń arasynda turmystyq zorlyq-zombylyqqa ushyraǵan áıelder men balalar da bar. Olarǵa ýaqytsha baspana usynylyp, quqyqtyq jáne psıhologııalyq qoldaý kórsetiledi. Sonymen qatar qujattardy rásimdeýde, jumysqa ornalasýda, balalardy mektep pen balabaqshaǵa ornalastyrýda, turǵyn úı máselesin sheshýde naqty kómek berildi, – deıdi Ortalyq dırektory Nazym Shaqaeva.
Onyń aıtýynsha, mundaǵy basty maqsat – qıyndyqqa tap bolǵan árbir otbasyna jan-jaqty kómek kórsetip, turaqtylyq pen qoǵamnyń qoldaýyn qalyptastyrý. Aldaǵy ýaqytta mobıldi toptardyń jumysyn kúsheıtip, áleýmettik osal toptarǵa arnalǵan túrli is-sharalar uıymdastyrý josparlanyp otyr.
Qoldaý ortalyǵynyń kómegine júginip júrgen jalǵyzilik ana Záýre Muratqyzymen de tildesýdiń sátti túsken. Záýre apamyz ortalyqtan tegin quqyqtyq keńes alyp, mamandardyń aqparattyq qoldaýyna rıza ekenin aıtty.
– Ár kimniń izdenip kelgen taqyrybyna saı qoldaý-kómek bola jatyr. Osyndaı ortalyq bar degendi estip, zań turǵysynda kómekke júgingen edim. Men úı kezeginde turǵan adammyn, biraq áli bolmaı jatyr. Qazir balalarym kámelet jastan asyp ketti. Joldasym ómirden ozǵan. Osyǵan baılanysty quqyqtyq keńes alyp júrgen jaıym bar. Ortalyq bárin aldyńa ákelip bermes, bir-aq kúnde bárimizdiń problemamyzdy sheship bere almaıtyny da túsinikti, deı turǵanmen mundaı qoǵamdyq qoldaýdyń ózi az kómek emes, – deıdi apamyz.
Árbir otbasynyń taǵdyry árqıly bolǵanymen, bárine ortaq nárse – qoldaýǵa degen muqtajdyq. Osyndaıda memleket pen qoǵam birlese áreket etkende ǵana qıyndyqqa tap bolǵan jandarǵa kómektese alatyny túsinikti. Otbasyn qoldaý ortalyǵy sonyń aıǵaǵy ispetti.
Abaı oblysy
