Qonaev qalasynyń ákimi shahardy kezekti ret aralaý barysynda birqataryna kirip shyqty. Aldymen ol «Samuryq» TÚK-ke bardy. Bul keshen 11,6 gektar jerde turǵyzylady dep josparlanýda. Joba 2029 jylǵa deıin júzege aspaq. Tartylatyn ınvestısııa somasy – 65 mlrd teńgeni quraıdy. Qazir qurylystyń 1-kezeńi júrip jatyr. Munda jalpy aýdan 160 myń sharshy metrden astam turǵyn úı boı kóteredi.
Kelesi nysan 10 shaǵynaýdanda ornalasqan «NNS City» turǵyn úı kesheni boldy. Tapsyrys berýshi – «Alı-Nur trans» JShS. Munda 21 kópqabatty turǵyn úı salynady. Qazir tórteýiniń qurylysy aıaqtalǵan, jaqyn arada aýlany abattandyrý bastalady. Sodan keıin birden qoldanysqa beriledi.
«Injenerlik jelilerdi tartý jumystary ýaqytyly júrgizilýi tıis. Keıinnen qonystanǵan halyq arasynda sapasyz qurylysqa shaǵym bolmaýy qajet. Ákimdikpen birlese, aqyldasa qyzmet etińizder. Úı salý jaqsy, onyń sapaly bolýy odan da mańyzdy», - dedi Ashat Berdihanov.
Odan soń ákim kúrdeli jóndeýden ótip jatqan 8-10 shaǵynaýdannyń jolyn kórdi. Bul jerde kóshe jaryǵyn ornalastyrý máselesi qarastyryldy. Jolaýshylar tasymaly jáne avtomobıl joldary bóliminiń basshysy Baǵdat Alıevtiń sózinshe, joba 2026 jylǵa ótpeli bolady. Ákim kóshe jaryǵyn qoıýda adamdarǵa yńǵaıly bolýy qajettiligin atap ótti. Búginde munda birshama jumystar aıaqtalǵan, trotýar bordıýrlary, aıaldamalar qoıylyp, joldyń keı bóligine asfalt tóselgen. Bul jumystar qalanyń Bas josparyna sáıkes atqarylýda.
Aıta keteıik, bıyl Sheńgeldi aýyldyq okrýgindegi eldimekenderdiń joly aǵymdaǵy jóndeýden ótýde. Sondaı-aq «Kóshpendiler qalashyǵyna» jańadan jol salynýda. «Qarlyǵash» yqshamaýdanynda da jol kúrdeli jóndeýden ótýde.
Qurylys salasyna kelsek, jyl basynan 18843 sharshy metr turǵyn úı qoldanysqa berildi. Al qurylys jumystarynyń kólemi 9,7 mlrd.teńgeni qurady.
Almaty oblysy.
