Ár oqýshyǵa sapaly bilim berý úshin pán muǵalimderine zor jaýapkershilik júkteledi. Degenmen oqýshylardyń minez-qulqyn qalyptastyrýda pedagog-psıhologtiń atqarar mindeti az emes. Eńbek jolyn 1992 jyly munaıly shaharda ornalasqan Ǵ.Músirepov atyndaǵy №5 orta mektepte pedagog-psıholog bolyp bastaǵan Lázzat Jaıshylyqqyzy da bilim salasyna laıyqty úlesin qosyp keledi.
Ony áriptesteri tájirıbeli ustaz retinde qurmetteıdi. О́ıtkeni onyń tájirıbesi satylap tolysty. Mektepte jeli tartqan eńbek joly birneshe jyldan soń oblystyq balalardy ońaltý ortalyǵy dırektorynyń orynbasary laýazymynda jalǵasty. Bilikti maman qalalyq bilim bólimine shaqyrylyp, ádiskerlik qyzmetti atqardy. Keıingi tórt jyldan beri «Atyraý oblystyq arnaıy mektep-ınternaty» KMM dırektory qyzmetine taǵaıyndaldy.
Bul – ádettegi bilim ordalaryna uqsamaıtyn ujym. Mundaı mekemeni basqarýǵa kez kelgen pedagogtiń júregi daýalamaıdy. Ustazdarynan erekshe kútim men kózqarasty, eń bastysy, meıirimdi kútetin balalar oqıtyn mektep-ınternatqa jetekshilik etý úshin tájirıbe de, psıholog te, tipti defektolog-olıgofrenopedagog te bolýy qajet. Osy turǵydan aıtqanda, jergilikti bilim salasynyń basshylary dırektorlyqqa Lázzat Tólepovany tańdady.
Tájirıbeli pedagogtiń jetekshiligimen 2022–2025 jyldary atalǵan mektep-ınternattyń materıaldyq-tehnıkalyq bazasy jańartyldy. Atap aıtqanda, fızıka, hımııa, bıologııa, tarıh, geografııa, dene tárbıesi, beıneleý óneri, mýzyka jáne tehnologııa pániniń kabınetteri tolyq jabdyqtaldy. Al logoped kabıneti men sensorlyq bólme jańa oqý quraldarymen qamtamasyz etildi. Mektep-ınternattyń jataqhanasyna jańa jıhaz alyndy.
Al bilimdi shákirtteri respýblıkalyq jáne halyqaralyq saıystarda aıtarlyqtaı jetistikke jetip júr. Máselen, «Almaly KZ» halyqaralyq festıvaline qatysqan Aınaz Quralova bas júldege ıe boldy. Bıyl dál osy oqýshy Germanııada ótken paradzıýdo olımpıadasynda kúmis júldeni enshiledi.
Erekshe balalardyń sapaly bilim alýyna barynsha jaǵdaı jasap, ujymdy ortaq iske uıystyryp otyrǵan Lázzat Tólepovanyń kásibı jetistigi kóp. Oblystyq bilim basqarmasy janyndaǵy ádistemelik kabıneti uıymdastyrǵan «Úzdik ádisker – 2021» baıqaýynyń bas júldesin ıelendi. Bilim salasyna qosqan kópjylǵy eńbegi úshin Bilim jáne ǵylym mınıstrliginiń Alǵyshatymen, «Bilim berý isiniń qurmetti qyzmetkeri» tósbelgisimen marapattalǵan. Ol bilimin udaıy jetildiredi. Reseı Federasııasyndaǵy Ońtústik federaldy ýnıversıtetinen (Dondaǵy Rostov) magıstratýra bitirdi. Psıholog retinde kóńilge túıgeni men tájirıbesi jónindegi ǵylymı maqalalary respýblıkalyq basylymdar men jınaqtarda jarııalanǵan.
«Ustazdyq – júregimniń tańdaýy, balaǵa degen mahabbatymnyń máńgilik shamshyraǵy. Shákirtterimniń bilimdi, sanaly bolǵanyn qalaımyn», deıdi L.Tólepova.
Jaqynda Prezıdenttiń Jarlyǵymen «Qurmet» ordenimen marapattaldy. Ony ustazǵa Memleket basshysy tapsyrdy. Bala janynyń baǵbanyna aınalǵan tájirıbeli pedagog muny ujymnyń ortaq jetistigi sanaıdy.
Atyraý oblysy
