Foto: Ashyq derekkóz
Oblystyq týrızm basqarmasynyń basshysy Qýanysh Mırambekulynyń málimetinshe, demalýshylardyń basym bóligi jazda Qapshaǵaı sý qoımasyna barýdy jón kórgen. Munda 1,8 mıllıonǵa jýyq adam tynyqqan. Sondaı-aq Kólsaı kólderi, Sharyn shatqaly jáne Ile-Alataý ulttyq parkine 700 myńnan astam týrıst barǵan. Onyń ishinde 530 myńnan kóbi Kólsaı kólderine taban tirepti.
«Ár úshinshi saıahatshy — sheteldik týrıst. Jalpy, bıylǵy toǵyz aıdyń qorytyndysy boıynsha sheteldik qonaqtar sany 12 paıyzǵa, ishki týrızm kólemi 25 paıyzǵa ósti», dedi Qýanysh Mırambekuly.
Aıta keteıik, óńirge Úndistannan, Parsy shyǵanaǵy elderinen jáne Reseıden kelgen qonaqtar jıi kezdesedi. Sarapshylardyń aıtýynsha, mundaı ósim ınfraqurylymnyń júıeli damýynyń nátıjesi.
Bıyl týrıstik baǵyttardy abattandyrýǵa 171 mıllıon teńge bólingen. Qarajat esebinen «Kólsaı kólderi», «Ile-Alataý» ulttyq parkteri men Qonaev qalasynda pırster, ekosatylar, kireberis nysandar, ot jaǵýǵa arnalǵan alańdar ornatylyp, jańa serýen joldary salynyp jatyr.
Esterińizge sala keteıik, 2025 jyldyń alǵashqy alty aıynda Qazaqstanǵa 7,5 mıllıon sheteldik týrıst kelgen.
