Foto: Ellington týrıstik aýdany maketi/ Úkimettiń baspasóz qyzmeti
«Qalada eń úlken saýda oıyn-saýyq ortalyǵy salynyp jatyr. Ol jerde akvapark bolady. Qurylysy 2-3 jylda aıaqtalady dep josparlanǵan. Sheteldik kompanııa óz qarajatyna salyp jatyr, bıýdjetten aqsha bólinbegen. Ákimdik tarapynan sý jáne káriz ınfraqurylymyn tartý boıynsha kómek kórsetiledi», dedi ol.
Buǵan deıin Astana ákimdigi men «Ellington Group KAZ» Ltd kompanııasy arasynda kópfýnksıonaldy týrıstik aýdan qurý týraly ınvestısııalyq jobaǵa baılanysty memorandýmǵa qol qoıylǵan. Jobanyń jalpy quny shamamen 1 mlrd dollardy quraıdy.
Úkimettiń málimetinshe, keshenniń jalpy aýmaǵy 2,6 mln sharshy metr, al qosymsha qurylys aımaǵy 333 gektardy qamtıdy. Munda aýmaǵy 15 myń sharshy metr bolatyn akvapark, oıyn, demalys aımaqtary, saıabaqtar, terrasalar, keńse jáne kommersııalyq nysandar, qonaqúıler, áleýmettik jáne turǵyn úıler salý kózdelgen.
