Foto: naryk.kz
QR Azamattyq kodeksinde jańadan salynǵan ǵımaratqa kepildik merzimi - 10 jyl, salalyq kodekste - 2 jyldan kem bolmaý kerek delingen. Mınıstr bul merzimdi 5 jylǵa deıin uzartý kózdelip otyrǵanyn atap ótti.
Dese de májilis depýtaty Marhabat Jaıymbetov bul merzimniń de jetkiliksiz ekenin aıtyp, saldaryna toqtaldy.
«Qurylys kompanııalary osyny paıdalanyp, eki jyldyq kelisimshartqa otyrady. Al eki jyldyń ishinde ǵımarattyń syrty bútin, ishi túzý kóringenimen, ýaqyt óte kele aqaýlar paıda bolyp, avarııalyq jaǵdaıǵa jetip jatyr. Úsh jyldan keıin qulap jatqan mektepter, qasbetterdiń qulap, sál jel tursa shatyrlardyń ushyp jatqanyn kórip júrmiz. Sondyqtan eki jyldyq kepildik – jumys istep ketsek boldy degen túsiniktiń týyndysy. Onyń saldary - sýyq aýrýhanalar, tóbesinen jańbyr tamshylaǵan - mektepter. Biz bir top depýtat usynys jasaǵanbyz. Irgetasqa, qasbetke, shatyrǵa, tirek qabyrǵalaryna kepildik 10 jyl bolý kerek. Basqa elementterge 5 jyl bola bersin», dedi depýtat.
О́z kezeginde Ersaıyn Naǵaspaev depýtattyń sózimen kelisip, usynys áli de pysyqtalatynyn aıtty.
«Shynymen de qazirgi eki jyldyq kepildik qurylysta defekt shyqqan kezde qıyndyqtar týyndatady. Sondyqtan biz qurylys kompanııalarynyń jaýapkershiligin kúsheıtý úshin kepildik merzimin keminde 5 jylǵa deıin uzartýdy usynyp otyrmyz. Al siz ataǵan elementterge 10 jyldyq kepildik engizý máselesin pysyqtap jatyrmyz. Jalpy biz bul bastamany qoldaımyz», dedi О́nerkásip jáne qurylys mınıstri.
