Fýtbol. Qazaqstan men Moldova teń oınady

ASTANA. 19 aqpan. Keshe túnde Túrkııanyń Antalıa qalasyndaǵy «Mardan» stadıonynda Qazaqstan jáne Moldova qurama komandalary joldastyq kezdesý ótkizdi. Match 1:1 esebimen teń aıaqtaldy. Bul týraly Vesti.kz tilshisi habarlady. Kezdesýdiń birinshi taımynda eki jaq bir-birleri qaqpalarynyń qulpyn asha almady. Oıynnyń basynda qazaqstandyqtar urǵan aıyp doby qarsylastar toryna kirip kete jazdady. Al ekinshi taımnyń basynda, 47-mınýtta qazaqstandyqtarǵa birinshi bolyp esep ashýdyń oraıy keldi. Dopty alańǵa sol kezde shyqqan Baýyrjan Islamhannan pas alǵan Alekseı Shetkın túsirdi. Alaıda, jerlesterimizdiń bul basymdylyǵy uzaqqa bara qoımady. Moldovandar 55-mınýtta tarazy basyn teńestirip ketti. Ony qaqpa alańyna áýeleı jetken dopty shalqalaı berip, artqa qaraı kelistirip urǵan Aleksandr Gaskan saldy. Aıta ketýimiz kerek, bas jattyqtyrýshy Iýrıı Krasnojan bul joly alańǵa eksperımentti quramdy shyǵardy. Sonyń qatarynda «Astana» sapynda oınaıtyn Nenad Erıch birinshi ret qaqpa qorǵady. Qazaqstan azamattyǵyn alǵan bul fýtbolshy osylaı óziniń alǵashqy synaǵyn ótkizdi. Endi bizdiń qurama kelesi oıynyn 28 naýryz kúni ótkizbekshi. Onda Qazaqstan quramasy Eýropa birinshiligi irikteý týrnıri sheńberinde Islandııany qabyldaıdy. Sodan keıin, 31 naýryzda Reseı quramasymen joldastyq kezdesý ótkizedi. Matchtyń oınalatyn jeri áli belgilengen joq. Onyń Máskeý qalasynda oınalýy da múmkin. Damır Qojamqul. Derek, foto: Vesti.kz.