Taıqazan Petropavldan Pavlodarǵa tabys etildi

PETROPAVL. 19 aqpan. «Qazaqstan halqy Assambleıasy-20 ıgi is «estafetasy aıasynda uıymdastyrylǵan aksııa Qyzyljar óńirin birneshe kún aralap, óz máresine jetti. Bul týraly egemen.kz tilshisi habarlady. Shara barysynda uıymdastyrylǵan kóshpeli baspasóz konferensııasyna ákimdiktiń jaýapty qyzmetkerleri men etnomádenı birlestik ókilderi qatysty. Olar aksııa aıasynda atqarylǵan jumystarǵa toqtaldy. Jıyndy oblys ákiminiń orynbasary Anarhan Dúısenova ashty. Ol Prezıdenttiń «Bizdiń basty baılyǵymyz – birligimiz. Men aýyzbirshilikten aınymaıtyn aqjúrek jurtymnyń qýatty ultqa, shýaqty ulysqa aınalaryna kámil senemin» degen paıymdaryn eske sala otyryp, halyqtar men dinder arasyndaǵy kelisim Qyzyljar óńiriniń de basty ózegi bolyp tabylatynyn alǵa tartty. Onyń sózin «Orys qaýymdastyǵy» uıymynyń basshysy Nıkolaı Avdeev, «Qazaq tili» qoǵamynyń tóraǵasy Káribaı Musyrman, SQMÝ-gi Qazaqstan Assambleıasy kafedrasynyń jetekshisi Lıýdmıla Grıvennaıa, taǵy basqalary tolyqtyryp, bizdiń Otanymyz – ortaq, tilegimiz – bir, maqsatymyz jalǵyz. Máńgilik El – ata-babalarymyzdyń san myń jyldan bergi asyl armany. Keleshegi kemel Nurly jolda birligimiz berik bolsyn degen tilekterin arnady. Estafetanyń sońǵy núktesi Pogodın atyndaǵy orys drama teatrynda qoıyldy. Onda oblys ákiminiń orynbasary A.Dúısenova Qazaqstan halqy Assambleıasy jylynyń ashylý rásimine oraı uıymdastyrylǵan «20 ıgi is» estafetasynyń sımvoly – Taıqazandy   Pavlodar oblystyq assambleıasynyń hatshylyq meńgerýshisi Seısenbaı Jetpisbaevqa dúıim jurtshylyqtyń aldynda saltanatty túrde tabys etti. Saltanatty rásim sońy konsertke ulasty. О́mir Esqalı. Derek: egemen.kz. Sýret: «QazAqparat».