Ulttyq statıstıka bıýrosynyń málimetinshe 2025 jyldyń qazan aıynyń basynan beri áleýmettik mańyzy bar segiz azyq-túlik túriniń baǵasy tómendegen. Alty taýar boıynsha baǵa turaqty deńgeıde saqtalǵan. 30 qyrkúıek pen 7 qazan aralyǵyndaǵy apta ishinde áleýmettik mańyzy bar azyq-túlik taýarlarynyń baǵa ındeksi 0% deńgeıinde boldy. Pııaz 2,6%-ǵa, sábiz 1,7%-ǵa, qyryqqabat 1,0%-ǵa, kartop 0,8%-ǵa, kúnbaǵys maıy men qant 0,3%-ǵa, un men kúrish –0,1%-ǵa arzandady.
Nan, rojkı, taýyq eti, aıran jáne tuz baǵasy ózgerissiz qaldy.
Sondaı-aq bir apta ishinde keıbir ónimderdiń baǵasy ósti: qaraqumyq jarmasy 0,7%-ǵa, sıyr eti 0,4%-ǵa, sary maı men jumyrtqa 0,3%-ǵa, sút pen súzbe 0,1%-ǵa qymbattady.
- О́ńirlik komıssııalar baǵa túzilý tizbegindegi tıimsiz jáne negizsiz deldaldardy anyqtaý baǵytynda júıeli jumys júrgizip keledi. 2025 jyldyń basynan beri 797 otyrys ótkizilip, olardyń barysynda negizsiz baǵa ústemeleri anyqtaldy. Aýmaqtyq departamentter áleýmettik mańyzy bar azyq-túlik taýarlaryna belgilengen 15%-dyq shekti saýda ústemesiniń saqtalýyn baqylaýdy jalǵastyrýda. Bıyl osy talapty buzǵandarǵa qatysty 2 293 ákimshilik qaýly shyǵarylǵan. Sonymen qatar, 9 890-nan astam elektrondy shot-faktýra (EShF) tizbegi taldanyp, olardyń 886-synda zańnamany buzý qaýpi anyqtalǵan, - dep atap ótti Saýda jáne ıntegrasııa mınıstrliginen.
Qazirgi ýaqytta aýyl sharýashylyǵy jármeńkeleri belsendi ótkizilip jatyr. Sonymen qatar, «Bereke Fest» jobasy iske qosyldy. Bul bastama aıasynda saýda jelileri áleýmettik jaýapkershilik tanytyp, arnaıy sóreler uıymdastyrdy jáne agrofırmalarǵa et pen áleýmettik mańyzy bar ónimderdi jetkizý júıesine tikeleı qatysýǵa múmkindik berdi. Jobaǵa 80 saýda jelisi qatysyp otyr.
Buǵan qosa, Respýblıka kúnin merekeleýge daıyndyq júrip jatyr. Saýda jáne ıntegrasııa mınıstrligi iri saýda-oıyn-saýyq ortalyqtarymen jáne onlaın saýda platformalarymen kelissózder júrgizdi. Jeńildikter aksııasy azyq-túlik jáne azyq-túlikke jatpaıtyn taýarlardyń keń aýqymyn qamtıtyn bolady.
Tórtinshi toqsanda senbi, jeksenbi jáne mereke kúnderi shamamen 1 700 aýyl sharýashylyǵy jármeńkesin ótkizý josparlanyp otyr. Otandyq óndirýshilerge bul jármeńkelerde saýda jasaý úshin oryndar tegin usynylady.
