«Otello»  – Taraz tórinde

О́tken aptada Jambyl oblystyq qazaq drama teatry Ý. Shekspırdiń «Otello» pesasyn sahnaǵa shyǵardy. Árıne, osydan tórt ǵasyr buryn jazylsa da áli kúnge álemdik sahnalardyń tórinen túspeı kele jatqan bul klassıkalyq shyǵarmany tańdaý, sahnalaý, tragedııanyń túıinin jetkize bilý ońaıǵa túspegeni anyq. Oǵan da úlken júrek, kúsh-jiger qajet. Bálkim, bul áıgili shyǵarmany maqtanysh, ataq-dańqyn aspandatý, baqaı esep úshin sahnaǵa súırep shyǵarýǵa bolatyn shyǵar. Biraq, kórermen kóńilinen shyqpasań, «Otellonyń» ózińe oq bolyp atylatyny taǵy anyq. Jambyl oblystyq drama teatry bul tragedııany osydan qyryq jyl buryn sahnalap, sol kezderde «Otello» osy óner shańyraǵynyń tólqujatyna, basty qoıylymyna aınalyp ketken eken. Mine, endi 80 jyldyq tarıhy bar teatr klassıkalyq shyǵarmany taǵy da sahnalaýǵa táýekel etti. «Negizi ár qoıylymnyń aıtar oıy bolýy kerek qoı. Bul pesanyń ón boıynan satqyndyq, jekkórý, qyzǵanshaqtyq lebi esip turady. Qyzǵanshaqtyq qoǵamdy iritedi, el men eldi jaýlastyrady. Al, biz ondaı las nárselerden bıik turýymyz kerek. Iаǵnı, «Otellonyń» aıtar oıy áli kúnge mańyzdy» deıdi qoıýshy rejısser Asyl Qudaıbergenov. Eki saǵattaı ýaqytqa sozylǵan qoıylymdy jambyldyq kórermender jyly qabyldady. Shynynda sózge erý, qyzǵanshaqtyq, kóre almaýshylyq, ashýdy aqylǵa jeńdire almaý, bári-bári sahna tórinde kórinis taýyp jatty. Bir kezderi orys aqyny A. Pýshkınniń «Otellonyń basty tragedııasy qyzǵanshaqtyǵynda emes, tym sengishtiginde» degenine kóziń jetedi. Ásirese, basty róldi somdaǵan Málik Aqúrpekovtiń akterlyq sheberligine el qatty rıza boldy. «Otellonyń rólin somdaý árbir akterdyń basty armany desem, qatelespeıtin shyǵarmyn. O basta osy ról meniń enshime tıgende qatty qýandym. Biraq, keıin daıyndyq barysynda munyń úlken jaýapkershilik, óte qıyn ról ekenine kózim jetip, údeden shyǵa alam ba degen oıdan qatty qoryqtym. Bul qoıylymda men ózimniń qııalymdaǵy Otellony somdadym. Kórermen jaqsy qabyldaǵan sııaqty. Áıtse de bul toldym-boldym degen sóz emes. Men úshin Otellonyń ashylmaǵan qyrlary áli de kóp», deıdi bizben áńgimesinde akter Málik Aqúrpekov. Bul kúni Dezdemonanyń rólinde jas aktrısa P.Ryspanbetova, al Iаgony M.Qojalıev oınady. Jas akterlardyń ónerine qarap otyryp bul teatrdyń ózindik mektebi, júrip ótken joly, úni bar ekenin ańǵarasyz. «Bizdiń teatr klassıkaǵa basa nazar aýdarýda. Endigi tańdaýymyz – qazaq klassıkasy «Eńlik-Kebek» bolyp otyr. Qazaq teatry óz jolyn osy shyǵarmadan bastaǵan emes pe? Bul eki klassıkany da qazirgi urpaq kórýi, bilýi kerek. Tarıh úshin. Bir kezderi teatrda orta býyn úzilip qalyp edi. Qazir bári retteldi», deıdi Jambyl oblystyq qazaq drama teatrynyń dırektory Bolat Bekjanov. Oralhan DÁÝIT, «Egemen Qazaqstan». Jambyl oblysy. Sýretti túsirgen Aqádil RYSMAHAN.