Sýretti túsirgen – Jumabaı MUSABEK
Oblys ákimi Beıbit Isabaevtyń qatysýymen Taldyqorǵan qalasynda aǵash egý aksııasy uıymdastyrylyp, ekologııalyq senbilikke myńdaǵan adam qatysty. Ekologııalyq sharanyń aldynda aımaq basshysy eldi mekenderdiń tazalyǵyn qamtamasyz etýge arnalǵan oblystyq «Úlgili eldi meken» baıqaýynyń jeńimpazdaryn marapattady. «Úlgili aýdan ortalyǵy» atalymynda I oryndy Sarqan qalasy, II oryndy Jarkent qalasy, III oryndy Saryózek kenti enshilese, «Úlgili aýyl» atalymynda I oryndy Qaratal aýdanyndaǵy Kálpe aýyly, II oryndy Kóksý aýdany, Jarlyózek aýyly, III oryndy Eskeldi aýdanyndaǵy Aldabergenov aýyly, Alakól aýdanyndyǵy Aqtúbek aýyly aldy. Taldyqorǵan qalasy «Juldyz» shaǵyn aýdanynyń №25, №27 úıleriniń jáı seriktestigi, Tekeli qalasy, Jeńis kóshesiniń №11 úıiniń jáı seriktestigi «Úlgili aýla» atalymynda erekshelendi.
«Taza Qazaqstan» aksııasy – ekologııalyq mádenıetti jańǵyrtý men azamattyq jaýapkershilikti arttyrýdyń aıqyn kórinisi. Mundaı bastamalar qoǵamnyń qorshaǵan ortaǵa degen kózqarasyn ózgertedi, árbir turǵynnyń týǵan jer aldyndaǵy paryzyn eske salady. Jetisýdyń jasyl kelbeti men taza aýasy – búgingi eńbektiń jemisi, erteńgi urpaqtyń amanaty», dedi qala turǵyny, aıtysker aqyn Aıtaqyn Bulǵaqov.
Oblystyq juqpaly aýrýlar aýrýhanasynyń aldyndaǵy gúlzarda qylqan japyraqty, jalpaq japyraqty 500 túp aǵash otyrǵyzyldy. Jalpy oblysta senbilik aıasynda 9 430 túp kóshet egildi.
«Búgin dostarymyzben birge aǵash otyrǵyzý sharasyna qatystyq. Jastar qaýymynyń ókili retinde mundaı sharalarda belsendilik tanytyp, ózgelerge úlgi bolýǵa tyrysamyn. Qorshaǵan orta – bizdiń ortaq úıimiz. Tabıǵatqa janashyrlyqpen qaraý, tazalyq pen tártipti ustaný – qoǵamnyń basty mindeti», deıdi aımaqtyń belsendi jastarynyń biri Nurasyl Moldabekov.
Taldyqorǵannyń taǵy bir turǵyny Marjan Ǵylymbeqqyzy da Nurasyldyń sózin qýattap: «Senbilikke kishi ulymdy ertip, erterek keldim. Sol arqyly balama aýyr eńbekten qashpaýdy, tabıǵatty qalaı qorǵaýdy, súıýdi, týǵan qalasyna janashyrlyqpen qaraýdy úıretkim keledi. Bul qasıetterdi óskeleń urpaqtyń boıyna sábı kezinen sińirý kerek. Balam 7 jasta, búgin tuńǵysh ret kóshet ekti. Osyndaı ıgilikti isti esinde jaqsy saqtap, týǵan jerine qamqorlyq jasaýdy úırenedi dep oılaımyn», dedi.
Marapat alǵandardyń atynan sóz alǵan Sarqan aýdany, Sarqan qalasynyń ákimi Amantaı Orynbekov: «2025 jyly búgingi kúnge deıin myńnan asa aǵash egildi. Taǵy myńnan asa aǵash otyrǵyzý josparda bar. Myń tekshe metrden astam qoqys syrtqa shyǵaryldy. Marapat bizge eki ese jaýapkershilik júkteıdi. Tazalyq jumystaryn ári qaraı da jalǵastyramyz. Qalamyzdy taza ustaımyz», dep rızashylyǵyn jetkizdi.
Senbiliktiń jumysyn túıindegen oblys ákiminiń orynbasary Marlen Kólbaev atqarylǵan jumystardyń nátıjesimen tanystyra kelip: «Taza Qazaqstan» jalpyulttyq aksııasy aıasynda Jetisý oblysynda kóptegen is-shara uıymdastyrylyp jatyr. Apta saıyn «Taza beısenbi» sharasy ótkizilip, kásiporyndardyń, uıymdardyń ujymdary men bıznes-qaýymdastyq ókilderi ózderine tıesili aýmaqtardy tártiptke keltirip, tazartý jumystaryn júrgizedi, kógaldandyrady. Sondaı-aq ár eki apta saıyn senbilik ótkiziledi. Onda saıabaqtarǵa, gúlzarlarǵa, alleıalarǵa, aýlalarǵa, kóshelerge tazalyq júrgiziledi. Odan bólek, ekobaǵdarlama aıasynda kópqabatty úılerdiń shatyrlary jańartylyp, aýlalar tazartylady, balalardyń oıyn, sport alańdary salynyp, kósheler jaryqtandyrylady, eldi mekenderdi abattandyrýǵa qatysty kóptegen jumys atqarylady. Jyl basynda 120 myń túp aǵash kóshetin egý josparlanǵan edi. Soǵan sáıkes 56 myń kóshet kóktem kezinde tigilse, qalǵan 64 myń túp aǵashty kúz kezinde otyrǵyzamyz. Búgingi bir kúnniń ózinde 9,5 myń aǵash kósheti otyrǵyzyldy», dep atap ótti.
Jalpy, Jetisý oblysynda ótken senbilik barysynda 438,2 gektar aýmaq tazartylyp, 886 tonna qoqys jınaldy. Ekosharalarǵa 22 800 adam qatysty, 204 birlik tehnıka jumyldyryldy.
Jetisý oblysy
