Foto: «Otbasy bank»
Atalǵan baǵdarlama alǵash ret 2024 jyly júzege asyrylyp, oǵan 600 mıllıon teńge bólingen. Sonyń nátıjesinde 41 jas qonys toıyn toılady. Al bıylǵy jyldyń naýryz aıynda bastalǵan ekinshi kezeńinde taǵy 65 jas maman baspanaly boldy. Endi joba aıasynda oblys bıýdjeti esebinen 1,3 mıllıard teńge, al seriktes «Otbasy bank» tarapynan 331 mıllıon teńge qarajat qarastyrylyp otyr.
«Jaıyq jastary» – óńirimizdegi jas mamandardy qoljetimdi baspanamen qamtýdy kózdeıtin mańyzdy áleýmettik bastama. Bıyl bólingen qosymsha qarjy esebinen baspanaly bolatyn jastar sany aıtarlyqtaı artady», dedi oblystyq qoǵamdyq damý basqarmasynyń basshysy Darhan Qadyralıev.
Baǵdarlama sharttary jeńildetilgen: turǵyn úıdiń shekti baǵasy – 18 mln teńge, nesıe merzimi – 19 jylǵa deıin, paıyzdyq mólsherleme – 5%(jyldyq shyǵyny 5,2%-dan 5,7%-ǵa deıin). Qatysýshylar 21–35 jas aralyǵynda bolyp, sońǵy bir jyl BQO-da tirkeýde turýy jáne zeınetaqy aýdarymdary bolýy tıis. Sońǵy bes jylda turǵyn úıi bolmaǵandarǵa ǵana ruqsat. Bastapqy jarna – 10%, ıaǵnı shotta keminde 1,8 mln teńge bolýy qajet. Ár balaǵa qosymsha bir upaı beriledi.
Jobaǵa densaýlyq saqtaý, bilim, mádenıet, sport salasy mamandary, memlekettik qyzmetshiler, BAQ ókilderi, sondaı-aq «Batys sý arnasy», «Jaıyqjylýqýat», «Aqsaıjylýqýat» sııaqty kommýnaldyq kásiporyn qyzmetkerleri qatysa alady.
«Otbasy bank» BQ fılıalynyń dırektory Nurjan Qalıshanovtyń aıtýynsha, buǵan deıin 106 jas jańa páter alǵan. Endi taǵy 90-nan astam adam baspanaly bolady. Bul – óńirde jastardy turaqtandyrýǵa, otbasylyq ınstıtýtty nyǵaıtýǵa baǵyttalǵan mańyzdy qadam.
Úshinshi kezeń boıynsha ótinimder jyl sońyna deıin onlaın qabyldanady. Qujattardyń durystyǵy men tólem qabileti qatysýshynyń óz jaýapkershiliginde. Burynǵy nesıeler men ýaqytyly jasalmaǵan tólem ótinimge kedergi bolýy múmkin.
Baǵdarlamanyń alǵashqy qatysýshylarynyń biri, oraldyq muǵalim Torǵyn Imanbaeva qazir úsh bólmeli páterde turyp jatyr.
«Buǵan deıin páter jaldap, jataqhanada turdyq. Depozıtke aqsha jınap, biraq páterge jetkize almaı qınaldyq. «Jaıyq jastary» baǵdarlamasy jaıly estigen soń táýekel dep qatysqan edik. Jolymyz boldy, qazir ózimiz tańdaǵan úsh bólmeli páterde turyp jatyrmyz. Úıdi ózimiz tańdadyq. Aıyna 117 myń teńge tólep, óz úıimizge kirdik. Mundaı múmkindik úshin oblys pen bank basshylaryna alǵys aıtamyn», deıdi ol.
«Jaıyq jastary» bastamasy – aımaqtaǵy jastar saıasatynyń naqty nátıjesin kórsetetin úlgili joba. Ol óz eńbegimen turaqty ómir qurýǵa umtylǵan jas býynǵa senim men motıvasııa syılap otyr.
