Sýret: kff.kz
Skope qalasyndaǵy «Toshe Preoskı» stadıonynda ótken tartystyń birinshi taımynda bizdiń komanda shabýyldy kúsheıtip, qarsylastaryn sheńgeldep syǵymdaı tústi. Tars búrkenip qorǵanystyń qamyn kúıtteıtin ulttyq qurama bul oıynda «kózirin ashqandaı» kórindi. Shabýyldy údetip, soltústikmakedonııalyq oıynshylardy kádimgideı sastyrdy. 54-mınýtta «Jeńis» klýbynyń oıynshysy Dinmuhamed Qaraman ulttyq qurama sapyndaǵy óziniń alǵashqy golyn soqty. Komanda osy basymdyqty 73-mınýtqa deıin ustap turdy. Alaıda Soltústik Makedonııa quramasynyń kapıtany Enıs Bardı enshisine gol jazyp, 74-mınýtta tarazy basyn teńestirdi.
Matchtan keıingi baspasóz máslıhatynda ulttyq quramanyń bas bapkeri mindetin atqarýshy Talǵat Baısýfınov jigitterdiń minez tanytqanyna alǵysyn jetkizdi. «Soltústik Makedonııa ulttyq quramasynyń álem chempıonatyna joldama alý úshin baryn salyp, basymdyqty ýystan shyǵarmaýǵa kúsh salatynyn aldyn ala bildik. Jigitter jarady, olardyń shabýylyn der kezinde toıtaryp qana qoımaı, ózderi de alǵa umtyldy. Maqsatymyz úsh upaı oljalaý edi, biraq buıyrmady. Ulttyq qurama qataryna jańa qosylǵan oıynshylar senimge selkeý túsirmedi. Olardyń da qabilet-qarymyn synap kórdik. Jigitter osy baǵyttan taımaýy kerek», dedi Talǵat Márýauly.
Ulttyq qurama kelesi jyly ótetin álem chempıonatyna irikteý kezeńinen ázirge 7 upaı jınap, J tobynda 4-satyda tur. Sońǵy matchty 15 qarashada óz alańymyzda ótkizedi, Belgııa quramasyna qarsy oınaıdy.
